Jańa medısınalyq keshen quramyna 200 tósek-orynǵa arnalǵan stasıonar jáne bir aýysymda 500 adamdy qabyldaı alatyn emhana kiredi. Jobanyń jalpy quny 34,8 mlrd teńgeni qurady. Bas merdiger uıym – «Elhon» JShS. Nysan paıdalanýǵa qabyldandy.
ShQO ákimi atap ótkendeı, buǵan deıin aýrýhananyń negizgi korpýstary, onyń ishinde pedıatrııalyq bólimshe 80 jyldan astam ýaqyt buryn salynǵan. Qazirgi tańda jańartylǵan keshen zamanaýı talaptarǵa saı kópsalaly medısınalyq mekeme retinde qyzmet kórsetedi. Munda tek Rıdder qalasynyń turǵyndary ǵana emes, jaqyn mańdaǵy eldi mekenderdiń halqy da medısınalyq kómek ala alady.
Aýrýhana kesheniniń qurylysy «Zańsyz ıemdelgen aktıvterdi memleketke qaıtarý týraly» Zań aıasynda bólingen qarajat esebinen júrgizildi.
Jalpy aýdany 40 myń sharshy metrden asatyn úshqabatty ǵımarat qajetti medısınalyq qural-jabdyqtarmen tolyq qamtamasyz etilgen.
Keshen qurylymynda táýlik boıy jumys isteıtin stasıonar, kúndizgi bólim, pallıatıvtik kómek, konsýltatıvtik-dıagnostıkalyq jáne alǵashqy medısınalyq-sanıtarııalyq kómek kórsetý qyzmetteri qarastyrylǵan.
Qazirgi ýaqytta tıisti qujattardy rásimdeý jumystary aıaqtalý satysynda. Osy rásimder tolyq aıaqtalǵannan keıin kópsalaly aýrýhana kesheni turǵyndardy qabyldaı bastaıdy.
