Mádenıet jáne aqparat mınıstrliginiń aıtýynsha, IýNESKO Búkilálemdik mura ortalyǵyna Qazaqstan tarapynan eki atalymǵa qujattar joldanǵan. Atap aıtsaq, «Mańǵystaýdaǵy jerasty meshitteri» jáne «Uly Jibek joly: Ferǵana-Syrdarııa dálizi» transulttyq jobasy.
Sondaı-aq Túrkistan qalasynda ótken «Zaman men mádenıet dıalogindegi Iаsaýı murasy» atty halyqaralyq sımpozıýmyna 15 elden júzge jýyq ǵalym qatysqan edi. Memleket basshysynyń bastamasymen uıymdastyrylǵan forým qala mártebesin Túrki áleminiń ǵylymı ortalyǵy retinde nyǵaıtty. Aıta keteıik, qazirgi tańda Qoja Ahmet Iаsaýı kesenesin ǵylymı qalpyna keltirý jumystary júrgizilip jatyr.
Mınıstrliktiń habarlaýynsha, elimizde alǵash ret Qarahan, Aısha bıbi, Arystanbab, Qoja Ahmet Iаsaýı kesenelerine, kóne Otyrar qalashyǵynda zamanaýı sıfrlyq júıeler ornatylady. Iаǵnı sıfrlandyrý aıasynda elektrondyq bılet satý júıeleri, ózdiginen qyzmet kórsetý termınaldary, týrnıketter, jasandy ıntellektimen jabdyqtalǵan beınekameralar jáne basqa da zamanaýı quraldar qoıylady.
Tarıhı-mádenı murany saqtaý aıasynda bıylǵy jańalyqtyń biri ári biregeıi «E-museum» portaly bolyp otyr. Joba elimizdegi 285 mýzeı qoryn biriktirip, 66 myńnan astam eksponat qoljetimdi bolady. Portalda úsh ólshemdi modelder men vırtýaldy týrlar bar. Sonymen qatar bastama tarıhı murany saqtaý men ony halyqaralyq mádenı keńistikte keńinen tanytýdy maqsat etedi.
Jyldyń taǵy bir mańyzdy jobasy – «E-kıno» júıesi. Munda kınoteatrlardaǵy kórsetilimder birtutas sıfrlyq esepke alynady. Platformaǵa 68 kınoteatr qosylǵan. Júıe arqyly 20 310 bılet satyldy. Joba naryqtaǵy ashyqtyqty arttyryp, ulttyq kıno jumysyn taldaýǵa múmkindik beredi.
Mádenıet uıymdary da elektrondyq bıletterdi, ózdiginen qyzmet kórsetý termınaldaryn jáne zamanaýı baqylaý júıelerin engizip jatyr. Bul ózgerister qyzmet kórsetý sapasyn arttyryp, kelýshiler statıstıkasyn esepteýge sep bolady.
