Memlekettik til janashyrlaryna qurmet

Baılanys jáne aqparat qyzmetkerleri kúni qarsańynda  Mádenıet jáne sport mınıstrligi «Memlekettik til jáne BAQ» respýblıkalyq baıqaýynyń jeńimpazdary men buqaralyq aqparat quraldary qyzmetkerlerin saltanatty marapattaý rásimin ótkizdi. Onda Mádenıet jáne sport mınıstri Arystanbek Muhamedıuly jýrnalısterdi merekelerimen quttyqtap, mınıstrliktiń Qurmet gramotalary men Alǵys hattaryn tabystady. Merekelik sharany Mádenıet jáne sport mınıstrliginiń Tilderdi damytý men qoǵamdyq-saıası jumys komıteti men Sh.Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵy birlese uıymdastyryp, baıqaý memlekettik til saıasatyn buqaralyq aqparat quraldarynda nasıhattaý belsendiligin arttyrý maqsatynda ótkizilgen bolatyn. Oǵan qazaq jáne orys tilderinde merzimdi basylymdarda, ınternet-resýrstarda jaryq kórgen jarııalanymdar, efırge shyqqan habar, baǵdarlamalar boıynsha kelip túsken materıaldar qabyldandy. Báıgege jekelegen tilshilerdiń el aýmaǵyndaǵy BAQ-ta jarııalaǵan memlekettik tildiń qyzmet etý aıasyn keńeıtý, mártebesin nyǵaıtý jáne qazirgi memlekettik tildiń ahýaly týraly 200-den asa ótkir de ózekti materıaldar kelip túsipti. Baıqaý materıaldaryn senator, Qazaqstan Jazýshylar odaǵynyń tóraǵasy Nurlan Orazalınniń tóraǵalyǵymen elimizge belgili jazýshylar men tájirıbeli jýrnalıst mamandarynan quralǵan arnaıy qazylar alqasy qarastyryp, júldegerlerdi anyqtady. Qazylar alqasy qatysýshylardy «Úzdik maqala», «Úzdik telearna baǵdarlamasy», «Úzdik radıo baǵdarlamasy», «Úzdik saıt maqalasy» nomınasııalary boıynsha baǵa­la­dy. Qazylar alqasynyń sheshimimen ­ «Úzdik maqala» nomınasııasy boıynsha «Egemen Qazaqstan» respýblıkalyq gazetiniń sholýshysy Súleımen Mámet birinshi oryndy jeńip alsa, «Arqa aqshamy» qoǵamdyq-saıası aptalyq gazetiniń jaýapty hatshysy Qulyntaı Monaı ekinshi, Ekibastuz qalalyq «Otarqa» gazetiniń jaýapty hatshysy Darııa Jumadilova úshinshi oryndy ıelendi. Al «Úzdik saıt maqalasy» nomınasııasy boıynsha birinshi oryn «Memlekettik tildi damytý ınstıtýty» saıtynyń tilshisi Qymbat Silámbekovke buıyrsa, «Jas qazaq úni» gazetiniń redaktory Dastan Eldesov ekinshi, Batys Qazaqstan oblysy «Qazaqparat» halyqaralyq aqparattyq agenttigi» JShS «Kaz­aqpa­rat.kz» saıtynyń menshikti til­shisi Ǵaısaǵalı Seıtaq úshinshi oryndy ıelendi. «Úzdik telearna baǵdarlamasy» nomınasııasy boıynsha «Birinshi Qaraǵandy» telearnasynyń tilshisi Almas Musabekov birinshi oryndy jeńip alsa, ekinshi, úshinshi oryndar «Jetisý» telearnasynyń redaktory Aıman Asylbekova men Qostanaı oblysy «Aksent» Lısakovsk telearnasynyń bas redaktory Dıana Lızýnovaǵa tabys etildi. «Úzdik radıo baǵdarlamasy» nomınasııasy boıynsha birinshi oryndy Qazaq radıosynyń Pavlodar oblysyndaǵy menshikti tilshisi Esenbek Sanatuly ıelenip, ekinshi, úshinshi oryndar «Rýdnyı daýysy» radıosynyń tilshisi Janarys Astanaev pen «Halyq radıosy» orys redaksııasynyń meńgerýshisi Ásemgúl Amanjolovaǵa buıyrdy. Sondaı-aq, táýelsiz Qazaqstannyń mádenıet, sport salalary men konfessııaaralyq kelisimdi damytýdy nasıhattaýda qol jetkizgen tabystary men jemisti shyǵarmashylyq qyzmeti úshin «Egemen Qazaqstan» gazetiniń sholýshysy Qarashash Toqsanbaı mınıstrliktiń Qurmet gramotasymen marapattaldy. Berik SADYR, «Egemen Qazaqstan».