Aqparat kózderiniń dereginshe, qaza tapqandardyń ekeýi Irannyń batysyndaǵy Lordegan qalasynda tirkelgen. Al bılik organdary batystaǵy Kýhdasht qalasynda bir adamnyń kóz jumǵanyn rastady. Sonymen qatar Hengaw uıymy eldiń ortalyq bóligindegi Isfahan provınsııasynda taǵy bir narazylyqqa qatysýshynyń oqqa ushqanyn habarlady.
Bastapqyda beıbit sıpatta bastalǵan narazylyq keıinnen demonstranttar men quqyq qorǵaý organdary arasynda qaqtyǵystarǵa ulasqan. Sherýler jeksenbi kúni ulttyq valıýtanyń kúrt qunsyzdanýyna jáne baǵanyń jappaı ósýine narazy bolǵan saýdagerlerdiń bas kóterýinen bastalǵan.
Fars agenttiginiń málimetinshe, Lordegan qalasynda qaýipsizdik kúshteri «qarýly narazylyq bildirýshiler» dep ataǵan toppen qaqtyǵys kezinde eki adam qaza tapqan.
Irannyń Islam revolıýsııasy saqshylar korpýsy Kýhdasht qalasynda ózimen baılanysty «Basıdj» erikti áskerı uıymynyń bir múshesi qaza taýyp, taǵy 13 adamnyń jaraqat alǵanyn habarlady. KIRS bul jaǵdaıǵa narazylyq bildirýshilerdi kinálap, olardyń sherýlerdi óz maqsattaryna paıdalanǵanyn málimdedi.
Sonymen qatar ondaǵan narazylyqqa qatysýshy ustalǵany habarlanyp otyr.
Irandaǵy tártipsizdikter el úkimeti úshin kúrdeli kezeńde ótip jatyr. Batys sanksııalary ekonomıkaǵa aýyr soqqy bolyp, ınflıasııa deńgeıi shamamen 40 paıyzǵa jetken. Buǵan qosa, maýsym aıynda Izraıl men AQSh tarapynan Irannyń ıadrolyq ınfraqurylymy men áskerı basshylyǵyna baǵyttalǵan áýe soqqylary jasalǵan.
Iran úkimetiniń resmı ókili Fatıme Mohadjeranı bılik ókilderi kásipodaqtar men saýdagerlerdiń ókilderimen tikeleı dıalog júrgizetinin málimdegen, alaıda naqty tetikterin ashyp aıtpady.
