Foto: istockphoto.com
Prezıdenttiń aıtýynsha, jańa tehnologııa dáýirinde órkenıetti el bolyp qalýdyń birden-bir joly – sıfrlandyrý men jasandy ıntellektini keńinen engizý.
«Qazaqstan sıfrlyq derjavaǵa aınalýy kerek. Bul – qazirgi jańa tehnologııa dáýirinde órkenıetti el bolyp qalýdyń birden-bir joly. Halqymyzdyń oı-sanasy mundaı ınnovasııalarǵa daıyn ekenine senimdimin. Onyń ústine, Qazaqstanda azamattarymyzdyń ómir saltyn edáýir ózgertken tanymal fınteh kompanııalar tabysty jumys istep jatyr.
Tehnologııa salasyndaǵy naǵyz álemdik alpaýyttar – AQSh pen Qytaı arasyndaǵy báseke qyza tústi. Amerıka basshysy AQSh-tyń ústemdigin nyǵaıtý úshin arnaıy baǵdarlama júzege asyryla bastaǵanyn málimdedi. Qytaıdyń da sheginetin oıy joq, olar muny ulttyń abyroı-bedeline qatysty másele dep sanaıdy. Qazirdiń ózinde Qytaıda jasandy ıntellekt máselesimen aınalysatyn bes myńǵa jýyq kompanııa jumys istep jatyr. Basqa damyǵan memleketter de qamsyz otyrǵan joq», dedi Memleket basshysy.
Aıta keterligi Qazaqstan da ekonomıka men qoǵamdyq ómirge jasandy ıntellektini engizýge basymdyq berip jatyr. Elimizdiń bul jumysqa qatysty bastapqy múmkindikteri jaman emes.
«Memleket kórsetetin qyzmetterdi, qarjy tehnologııalaryn, ekonomıkanyń birqatar sektoryn sıfrlandyrý isinde naqty jetistikterimiz bar. IT-startaptardy qoldaıtyn tolyqqandy ekojúıe tıimdi jumys istep tur. Eki myń kompanııanyń basyn qosqan Astana Hub ınnovasııalyq klasteri de bar. 2025 jyly IT-qyzmetterdiń jalpy eksporty bir mıllıard dollarǵa jýyqtady. Sıfrlyq aktıvterge arnalǵan CryptoCity pılottyq aımaǵy qurylyp jatyr. Jedel damıtyn Alatau city qalasynyń qurylysy bastaldy. Memlekettik derekterdi jınaý jáne taldaý jumysynyń qarqyny kúsheıip keledi. Kásibı mamandar mundaı derekterdi aldaǵy dáýirdiń jańa altyny dep sanaıdy», dedi Prezıdent.
Suhbat barysynda jasandy ıntellektini ınstıtýsıonaldyq turǵydan damytý máselesine de toqtaldy. Byltyr mamyrda Jasandy ıntellektini damytý jónindegi keńes jumysyn bastaǵan. Qarasha aıynda «Jasandy ıntellekt týraly» zańǵa qol qoıylyp, ol jaqyn ýaqytta kúshine enedi. Sondaı-aq Jasandy ıntellekt jáne sıfrlyq damý mınıstrligi quryldy.
Prezıdenttiń aıtýynsha, elimizde Alem.Cloud jáne Al-Farabium atty eki sýperkompıýter iske qosylǵan. Astana qalasy ákimdigi Birikken Arab Ámirlikteriniń iri kompanııasymen birlesip, derbes sıfrlyq platforma ázirlegen.
Kadr daıarlaý máselesi de basty nazarda.
«650 myńnan astam stýdent AI-Sana baǵdarlamasy aıasynda bilim aldy. Aldaǵy ýaqytta Jasandy ıntellektige mamandandyrylǵan zertteý ýnıversıteti ashylady», dedi Memleket basshysy.
Prezıdent jasandy ıntellektini el damýynyń sheshýshi faktory dep atady.
«Jasandy ıntellekt paıda bolǵannan beri bolashaqtyń kemesine minip úlgeretin elder men eski zamanda qalyp qoıatyn elderdiń arasy alshaqtaı bastady. Sondyqtan, men sıfrlyq tehnologııalar men jasandy ıntellektini Qazaqstannyń damý jolyndaǵy basym baǵyt dep jarııaladym. Bıyl óte kóp sharýa atqarylady. Osy aıryqsha mańyzdy jumystyń tabysty bolaryna senemin», dedi Qasym-Jomart Toqaev.
