Foto: Úkimettiń baspasóz qyzmeti
Úkimet otyrysynda Premer-mınıstr áleýmettik sala memleket úshin basym baǵyt bolyp qala beretinin, Memleket basshysynyń tapsyrmasyna sáıkes barlyq áleýmettik mindettemeler tolyq kólemde oryndalatynyn jetkizdi. Alaıda, bıýdjet qarajatyn tıimsiz jumsaý men bıznestegi alaıaqtyqqa jol berilmeıtinin basa aıtty.
Oljas Bektenov óz sózinde jekemenshik sektordy qarjylandyrýdaǵy zańsyzdyqtardy toqtatýdy talap etti:
«Artyq qarjylandyrýdy toqtatý qajet. Adal básekelestikte jumys isteı almasa, bizge mundaı bıznestiń qajeti bar ma? Bul salada alaıaqtyq keńinen taralyp ketkeni bárine málim. Oqý-aǵartý, Densaýlyq saqtaý jáne Qarjy mınıstrlikterine bir apta ishinde atalǵan máselelerdi sheshýge qatysty naqty usynystar engizýdi tapsyramyn», dedi Úkimet basshysy.
Budan bólek, Premer-mınıstr Eńbek jáne halyqty áleýmettik qorǵaý mınıstrligine ákimdiktermen birlesip, járdemaqylar men túrli áleýmettik tólemderdi taǵaıyndaý kezinde alaıaqtyq jaǵdaılardy boldyrmaý úshin keshendi sharalar ázirleýdi júktedi. Memlekettik qoldaý tek zańdy jáne muqtaj azamattarǵa baǵyttalýy tıis ekeni erekshe ataldy.
