Kolomoıskııdiń jaqtastary «halyq vechesin» jınap jatyr

ASTANA. 24 naýryz. Dnepropetrovskide oblys gýbernatorynyń jaqtastary bolyp tabylatyn depýtattar men saıasatkerler jıyn jınap jatyr. Bul týraly RIA «Novostı» habarlady. Ýkraına prezıdenti Petr Poroshenkomen teketireste olıgarh gýbernator Igor Kolomoıskııdi qoldaýshylar Dnepropetrovskide «narodnoe veche» shaqyrýdy qolǵa aldy. Muny Joǵary radada ótken baspasóz máslıhatynda Andreı Denısenko jetkizdi. Mánbeniń málimeti boıynsha, jıyn sársenbi, 25 naýryz kúni keshki 19:00 saǵatta bastalatyn bolyp belgilengen. Eske sala keteıik, munyń aldynda Ýkraına parlamentine Dnepropetrovsk oblysynan saılanǵan Andreı Denısenko, Vıtalıı Kýprıı jáne Aleksandr Dýbının ózderiniń «Petro Poroshenko blogy» fraksııasynan shyǵatyndaryn málimdegen bolatyn. Qazir Dnepropetrovsk oblysynyń gýbernatory Igor Kolomoıskıı men Ýkraına bıliginiń arasy barynsha ýshyǵyp tur. Ol 19 naýryz kúni Joǵary radada aksıonerlik qoǵam týraly zańǵa Ýkraınanyń asa baı adamdarynyń birinen sanalatyn Kolomoıskııdi «Ýkrnaftaǵa» baqylaý jasaý quqyǵynan aıyratyn ózgerister engizilgennen keıin oryn aldy. Osydan keıin Kolomoıskııdiń adamdary uıymnyń ofısin basyp alyp, onyń syrtyn dereý temir sharbaqpen qorshap tastady. Olıgarh ǵımaratty qorǵaýǵa qarýly kúshterin shyǵardy. Keıirinek Ýkraına ulttyq gvardııasynyń eki batalony Dnepropetrovskige bet alǵany belgili boldy. Murat Aıtqoja.