Batys Qazaqstanda ústine televızor qulaǵan sábı qaza tapty

ORAL. 24 naýryz. Osy aıdyń 21-i kúni Batys Qazaqstan oblysynyń Bókeı ordasy aýdany, T.Masın atyndaǵy aýyldyq okrýginde kishkentaı balanyń ústine televızor qulap ketip, sonyń saldarynan jantásilim etken. Bul týraly «Moı gorod» portaly habarlady. «Qaza tapqan aýyldyq mektepte muǵalim bolyp isteıtin kelinshektiń 4 jasar uly bolyp shyqty. Sol kúni ol jumysqa ketip, úıde balalarmen ákesi qalady. Otaǵasy úı sharýasy jaıymen shamaly ýaqytqa syrtqa shyǵyp ketken kezde atalǵan qaıǵyly oqıǵa oryn alypty», - dep áńgimeledi Bókeı ordasy aýdanynyń ákimi Nurlan Rahymjanov. Biri - tórttegi, ekinshisi ekidegi eki ul bala bar bolǵany birneshe mınýtqa ǵana ózdi-ózimen ońasha qalǵan eken. «Olar, shamasy, oınap júrip, televızordy tartyp qalǵanǵa uqsaıdy. Al zildeı aýyr eski televızor sol kezde tómendegi tórt jasar balanyń týra basyna qulaǵan. Ákesi sol sátte-aq úıge kirip kelip, bolǵan jaıdy kórip qalady, biraq sábıdi qutqaryp qalýdyń oraıy kelmeıdi, ol jarty saǵattyń kóleminde jantásilim etedi», - dep túsindirdi ákim. Aýyldaǵylar osy qaıǵyly oqıǵa oryn alǵan otbasyn tek jaqsy jaqtarynan aıtyp otyr. Temir Qusaıyn. Mánbe, sýret: Moı gorod.