Alpidegi apatta opat bolǵandar sany 154-ke jetti

ASTANA. 24 naýryz. Germanııanyń Germanwings avıakompanııasynyń fransýzdyń Alpi taýlaryna soǵyp, apatqa ushyraǵan A320 jolaýshylar ushaǵynyń bortynda qaza tapqan adamdar sany 154-ke jetti. Bul týraly Germanııa ushý qaýipsizdigi qyzmeti ókiliniń deregine súıengen «Vestı.Ru» habarlady. «Biz bortta 154 adam otyrǵan, olardyń 6-y ekıpaj músheleri bolǵan dep shamalaımyz», - dep anyqtaı ótti ol Deutsche Welle teleradıokompanııasynyń efırinen. Buǵan qosa, qaza tapqandardyń 2-i sábı, 16-sy mektep oqýshylary ekeni de aıtylyp jatyr. «Budan buryn laınerdiń bortynda 148 adam bolǵany, olardyń 142-si jolaýshy, al 6-y ekıpaj músheleri ekenin habarlanǵan bolatyn», - dep baıandady TASS. Barselona – Dıýsseldorf baǵytynda ushyp kele jatqan ushaq Katalonııa ortalyǵynan shyqqan soń bir saǵat ótken kezde Joǵary Provans Alpisindegi bylaısha jetýi qıyn Trýa-Evevshe taýly jotasynyń Dın-le-Ben degen jerge jaqyn mańynda apatqa ushyrady. A320 aerobýsynyń fransýz keńistigine kirgen boıda birden alǵan bıiktiginen tómendeı bastaǵany berilgen apat dabyly arqyly belgili bolyp otyr. Biraq apatqa naqtyly neniń sebep bolǵany ázirge belgisiz. «Ushaq radarlar ekranynan Barselonet qalasy aýdanyna kirgennen keıin joǵalyp ketken», dep habarlaıdy «Interfaks». Biraq onyń bortynda naqtyly neniń isten shyqqany belgisiz. Laıner barýǵa qıyn aýmaqqa qulaǵan. Jergilikti turǵyndardyń aıtýlarynsha, eń jaqyn joldan ushaqtyń qańqasy jatqan jerge deıin jetý úshin keminde úsh saǵat ýaqyt kerek bolady. Germanwings kampanııasyna (Lufthansa–nyń enshiles kásiporny) qarasty áýe kemesi Barselonadan Dıýsseldorfqa ushyp shyqqan. Foansııa syrtqy ister mınıstrliginiń málimeti boıynsha, qulaǵan ushaq 1991 jyly shyqqan, ol Germanwings avıaparkindegi eń kóne ushaqtardyń biri bolǵan. Aldyn ala málimetke sáıkes, A320 bortynda negizinen Germanııanyń azamattary otyrǵan. Onda sondaı-aq 45 ıspan azamaty bolýy múmkin. Bul aqpardy Ispanııanyń vıse-premeri Soraııa Saens de Santamarııa rastap berdi. Murat Aıtqoja.