Sýretti túsirgender – A.Dúısenbaev, E.ÚKIBAEV
– Qoǵamymyzǵa, jalpy elimizge zań ústemdigi, tártip myqtylyǵy aýadaı qajet. Keıbir shetelderde bolyp jatqan qazirgi óte kúrdeli ahýaldy kórip, saıasatymyzdyń durystyǵyna bárimizdiń kózimiz jetip otyr, oǵan eshqandaı kúmán joq. Zań men tártip memlekettik saıasatymyzdyń negizgi qaǵıdaty retinde qabyldanýy kerek, bul qaǵıdatty jańa Konstıtýsııamyzǵa mindetti túrde engizý qajet dep sanaımyn. Sebebi bul eshqashan ózektiligin joǵaltpaıtyn, ómirsheń qaǵıdat ekeni daýsyz. Bas prokýratýranyń osy saladaǵy róli asa mańyzdy. Prokýratýra qyzmetkeriniń zańnyń buzylýyna beıtarap, selqos qaraýǵa quqyǵy joq, – dedi Prezıdent.
Qasym-Jomart Toqaev quqyq qorǵaý júıesin sıfrlandyrý úderisi birkelki emes, ıaǵnı ár jerde árqalaı júrgizilip jatqanyna nazar aýdardy.
– Ár mekeme sıfrlyq júıesin óz betimen damytýda. Bul sharýa júıesiz júrgizilip jatyr. Birtutas júıe joq. Mysaly, keıbir organdar sıfrlyq tásilderdi utymdy qoldanyp jumys istese, keıbiri durys amal-tásil taba almaı, qyrýar qarjy jumsap júr. Bul, basqa sózben aıtqanda, naǵyz jymqyrý. Sondyqtan qarajatty orynsyz jumsap, jańa dúnıe jasaýdyń qajeti joq. Úkimetke qoldanystaǵy barlyq sıfrlyq sheshimderdi saralap, tekserip, olardyń tıimdiligin arttyrýdy tapsyramyn. Kúshtik qurylymdarǵa arnalǵan túsinikti qurylymy bar jáne tehnologııalyq standarttary birkelki biryńǵaı sıfrlyq ekojúıe jasalýǵa tıis, – dedi Memleket basshysy.
Prezıdent aqparattyq keńistikte azamattardyń derbes derekteriniń taralýy jıilep ketkenin atap ótip, olardy qorǵaý baǵytyndaǵy jumyspen júıeli túrde aınalysý qajet ekenin aıtty. Memleket basshysy kıberqylmyspen kúres máselesine de toqtaldy.
– Álemde kıberqylmys órship barady. Jyl saıyn myńdaǵan azamatymyz sonyń qurbany bolyp jatyr. Qazir ınternettegi alaıaqtyq qylmystardyń besten biri ǵana ashylady. Bul – óte tómen kórsetkish. Kıberqylmyspen kúres tásilderin túbegeıli qaıta qaraý qajet. Sıfrlyq qaterge tótep berý úshin quqyq qorǵaý organdary bir qadam alda júrýge tıis. Ozyq oılap, artta qalmaýdyń amalyn tabý qajet, – dedi Prezıdent.
Qasym-Jomart Toqaev kóshi-qon úderisterin jappaı sıfrlandyrýdy óte ózekti másele retinde atady.
– Kóshi-qon úderisterin jappaı sıfrlandyrý kerek. Bul – óte ózekti másele. Baıaǵydan beri talqylap jatyrmyz, durys, oń nátıje az. Qazir álemde kúrdeli ahýal qalyptasyp otyr. Dúnıejúzinde keń aýqymdy kóshi-qon júrip jatyr desek, qate bolmaıdy. Qonys aýdarǵysy keletin sheteldikter úshin Qazaqstan – basqa elderge ótýge de, turaqtap qalýǵa da qolaıly memleket. Elge kelgen shetel azamattaryn ýaqtyly esepke alyp, olardyń júris-turysyn baqylaıtyn tehnıkalyq quraldardy jetildirý – asa mańyzdy mindet. Úkimetke Ulttyq qaýipsizdik komıtetimen birlesip, osy jumysty tezdetýdi tapsyramyn, – dedi Memleket basshysy.
Prezıdent áleýmettik jelide aqparat taratýda zań talaptary eskerilýi qajet ekenin jetkizdi.
– Tehnologııanyń qarqyndy damýy aqparattyq keńistiktiń túbegeıli transformasııasyna jol ashady. Qoǵamdy jikke bólip, azamattardy bir-birine qarsy qoıatyn destrýktıvti aqparat taratýǵa beıil adamdar da bar. Munyń bári óshpendilikke bastaıtyn eshkimge qajetsiz, tipti qaýipti pikirtalasqa jalǵasady. Jasandy ıntellektini osyndaı adamdar aqparattyq qarýǵa aınaldyryp, zańǵa qaıshy keletin kontentterdi kóptep tarata bastaıdy. Buǵan jol berýge bolmaıdy. Ondaı áreketterge quqyqtyq baǵa berip, jaýapkershilikke tartý qajet. Azamattarǵa destrýktıvti kontentti taratýdyń quqyqtyq saldary jóninde únemi túsindirý jumystaryn júrgizgen jón, – dedi Qasym-Jomart Toqaev.
Memleket basshysy tártipsizdik pen zańsyzdyqqa jol berýge bolmaıtynyn atap ótti.
– Ulttyq quryltaı otyrysynda men otanshyldyq uǵymy týraly pikirimdi aıttym. Otanshyldyq, bul jaı uran emes, otanshyldyq degenimiz – qasıetti sezim, munyń ásireultshyldyqqa esh qatysy joq. Qazaqstanda otanshyldyq uǵymyna jaýapkershilik pen jasampazdyq turǵysynan qaraýymyz kerek, ıaǵnı otanshyl azamat eń aldymen jaýapkershiligi joǵary jáne jasampaz azamat bolýǵa tıis. Otanǵa degen súıispenshilik – saıası upaı jınaý nemese qyzmettik mansap jasaý emes, bul – Otanyńa jaqsylyq jasaý, elińe paıda ákelý degen sóz, – dedi Prezıdent.
Sonymen qatar jıynda Bas prokýror Berik Asylov, Premer-mınıstrdiń orynbasary – Jasandy ıntellekt jáne sıfrlyq damý mınıstri Jaslan Mádıev, Prezıdenttiń kómekshisi Qýanyshbek Esekeev, Ishki ister mınıstri Erjan Sádenov sóz sóıledi.
