Foto: Aqorda
«Komıssııa músheleri usynǵan zańnamalyq erejelerde adam quqyqtary bárinen joǵary turatyny jáne adam kapıtaly eń qymbat qundylyq ekeni aıqyn kórsetilgen. Sondaı-aq ár azamattyń óz áleýetin iske asyrýǵa teńdeı múmkindik beretin ádil qoǵam qurýdy kózdeıdi.
Ǵylym-bilim, ınnovasııa salalaryn damytýdyń mańyzyna erekshe nazar aýdarylyp otyr.
Jańa tarıhı kezeńde elimizdiń sıfrlyq dáýirge beıimdelýi jetkiliksiz. Jasandy ıntellekt jáne basqa da ozyq tehnologııalar bizdiń qoǵamǵa qyzmet etýi qajet. Sondyqtan damý kóshiniń baǵytyn naqty aıqyndaýymyz kerek. Ata zańymyzda adamgershilik qundylyqtardy erekshelep, bólek jazý usynyldy. Bul da – óte mańyzdy.Basqasha aıtqanda, adam jasandy ıntellektige qyzmet etpeıdi, kerisinshe, adamzattyń aqyl-oıynan týyndaǵan jasandy ıntellekt turmys-tirshiliktiń barlyq salasynda tolaıym tabysqa jetýi úshin azamattarǵa kómektesedi», dedi Qasym-Jomart Toqaev.
Sondaı-aq Memleket basshysy baı mádenı muramyzdy saqtaýǵa, dáripteýge baǵyttalǵan volonterlerdiń qyzmetine de qoldaý bildiretinin aıtty.
«Konstıtýsııada gýmanıtarlyq qundylyqtardy qalyptastyrý mańyzdy dep sanaımyn. Atap aıtqanda, jalpyulttyq biregeılikti nyǵaıtýǵa, tabıǵatty aıalaýǵa basymdyq berý jóninde sóz qozǵap otyrmyz.
Bul másele búgingi baıandamashylardyń sózinde qamtyldy. Ideıalaryńyzdy qoldaımyn. Sonymen qatar baı mádenı muramyzdy saqtaýǵa, dáripteýge baǵyttalǵan volonterlerimizdiń qyzmetin de qýattaımyn», dedi Prezıdent.
Prezıdent óz sózinde Konstıtýsııaǵa engiziletin ózgerister elimizdiń damýyn jańa ári sapaly deńgeıge kóteretinin aıtty.
«Búkil memlekettik júıeni qaıta quryp, bılik pen qoǵamnyń yqpaldastyǵyn jetildire túsedi. Usynylǵan túzetýlerdiń ishinde jaýapty ári jasampaz otanshyldyq týraly ıdeıa bar. Patrıotızm – qur uran emes. Bul qasıetti uǵymǵa jaýapkershilikpen qaraǵan abzal. Men bul jaıynda jaqynda ótken Ulttyq quryltaı otyrysynda aıtqan bolatynmyn.
Otanshyl azamat degenimiz – jaýapkershiligi joǵary jáne jasampaz azamat. Men elimizdegi árbir eriktini – barshańyzdy dál osyndaı naǵyz otanshyl azamattar dep sanaımyn. Jaýapty ári jasampaz patrıotızm ıdeıasy árbir volonterdiń janyna jaqyn. Meniń buǵan esh kúmánim joq. Árbir azamat óziniń jáne qoǵamnyń ıgiligi jolynda kúndelikti adal eńbek etip, álemdi jaqsarta túsýge umtylýǵa tıis. Otanǵa degen shynaıy súıispenshilik – osy. Tanymal qoǵam qaıratkeri pastor Martın Lıýter Kıng «I have a dream», ıaǵnı «Meniń de armanym bar» degen edi. Sondyqtan «myna álemdi jaqsarta túsemin» dep armandańyzdar. Murattaryńyzǵa jetesizder dep oılaımyn», dedi Memleket basshysy.
Aıta keteıik, qazir elimizde volonterler sany 300 myńǵa jetken.
Sondaı-aq Prezıdent volonterdiń sıfrly pasportyn jasaý týraly usynysqa qoldaý bildirip, bıznes ókilderin volonterlik qyzmetke qoldaý kórsetýge shaqyrdy.
