Eń áýeli sportshy kýbıktiń tústerine qysqa ýaqyt qarap alady. Sol sátte ol kýbıktiń qalaı «aralasyp» turǵanyn mıyna saqtaıdy. Keıin kózin baılaıdy. Odan soń qolmen ǵana ustap otyryp, mıda saqtalǵan jospar boıynsha kýbıkti jınaıdy. Bir qarasań, bul matematıka sııaqty. Bir qarasań, mýzyka sııaqty. Eń bastysy, bári sanada júredi.
Guinness málimetinshe, Charlı Eggıns buǵan deıingi 12 sekýndtyq mejeden asyp tústi. Aldyńǵy rekordty amerıkalyq Tommı Cherrı 2024 jylǵy 11 aqpanda San-Dıegoda ótken jarysta qoıǵan edi. Iаǵnı, álemdegi eń myqty kýbıkshilerdiń ózinde aıyrmashylyq júzden bir sekýndpen ólshenedi.
Jarysta taǵy bir jetistik tirkeldi. Sol Sıdneıdegi jarysta Charlı Eggıns kózdi baılap sheshýdiń ortasha nátıjesi boıynsha da rekordqa teńesti. Guinness dereginde bul kórsetkish 14,05 sekýnd ekeni aıtylady.
Kózdi baılap sheshý – oıyn emes, jattyǵýmen shyńdalatyn óner. Munda zeıin kerek. Tártip kerek. Kún saıyn qaıtalaý kerek. Eń bastysy, mıǵa salmaq túsirýden qoryqpaý kerek.
Osyndaı rekordtar balalarǵa da paıaly. Qoldaǵy qarapaıym kýbık keıde balanyń logıkasyn ushtap, tózimin tárbıelep, tipti álemdik deńgeıge jol ashýy múmkin.
