Bul negizgi qaǵıda Ata zań jobasynyń «Konstıtýsııalyq qurylys negizderi» ataýly birinshi bóliminde kórinis tapty. Munda memlekettik basqarý túrin naqtylaý qajettiligi týraly oı bildirgen birqatar ǵalymdar men mamandardyń usynysy eskerilgen. Osylaısha, Qazaqstan Respýblıkasy prezıdenttik respýblıka ekeni aıqyndalǵan.
Konstıtýsııa jobasynyń novellalarynyń biri – Egemendiktiń jalǵyz ıesi retinde Qazaqstan halqyn bekitý normasy. Budan basqa, «respýblıkalyq referendým» túsinigi «jalpyulttyq referendým» dep ózgertilgen. Halyq óz bıligin tikeleı jalpyulttyq referendým men erkin saılaýlar, sondaı-aq memlekettik organdar arqyly júzege asyratyny týraly norma aıqyndalǵan.
Jarııalanǵan Konstıtýsııa jobasy – qoǵam tarapynan keń ári qyzý talqylaýlardyń, azamattar, saıası partııalar, qoǵamdyq uıymdar, quqyqtanýshylar men sarapshylardyń keń aýqymdy pikirtalastarynyń nátıjesi. Talqylaýǵa beıjaı qaramaıtyn azamattar da qatysyp, jalpy sany eki myńnan asqan ózderiniń pikirleri men usynystaryn e-Otinish pen eGov portaldary arqyly jibergen.
Jańa Konstıtýsııa jobasy qoǵam men memleket damýynyń strategııalyq mindetterine sáıkes keledi. Ol Qazaqstannyń qalyptasqan memlekettiliginiń negizderin qaıta bekitýmen birge, «Myqty Prezıdent – yqpaldy Parlament – esep beretin Úkimet» tujyrymdamasynyń logıkasyna da tolyqtaı saı keledi. Konstıtýsııa jobasynda belgilengen erejeler memleket pen qoǵamnyń jańa evolıýsııalyq kezeńin bastaýǵa negiz qalaıdy.
Jańa Konstıtýsııa jobasynda azamattardyń quqyǵyn sıfrlyq ortada qorǵaý normasy bekitildi
