foto: t.me/consot_kz
Ishki ister mınıstrligi jalǵan aqparat pen arandatýshylyq úshin jaýapkershilik bar ekenin eskertti.
«Qoǵamdyq keńistikte, onyń ishinde Qazaqstan Respýblıkasy jańa Konstıtýsııasynyń jobasyna qatysty, faktilerdi ádeıi burmalaý jáne jalǵan málimetter taratý jaǵdaılary tirkelýde. Mundaı áreketter azamattardy jańylystyryp, qoǵamdyq turaqtylyqqa qaýip tóndiredi», dep eskertti mınıstrlik.
Mysaly, Almaty qalasynyń turǵyny ınternette jańa Konstıtýsııa jobasynda jerdi sheteldikterge satýǵa tyıym alynyp tastaldy degen jalǵan aqparat taratqan.
Ishki ister mınıstrligi departamentiniń bastyǵy – resmı ókili Shyńǵys Alekeshevtiń aıtýynsha, bul málimetter shyndyqqa sáıkes kelmeıdi jáne olardy Jalǵan aqparatqa qarsy is-qımyl ortalyǵy resmı túrde joqqa shyǵarǵan.
Osyǵan baılanysty atalǵan azamat jalǵan aqparat taratqany úshin jaýapkershilikke tartyldy.
Sondaı-aq, Abaı oblysynda Semeı qalasynyń turǵyny jańa Konstıtýsııa jobasynda memlekettiń ýnıtarlyǵy men aýmaqtyq tutastyǵyna kúmán keltiretin túzetýler bar degen jalǵan aqparat jarııalaǵany úshin jaýapkershilikke tartyldy. Shyn máninde, bul qaǵıdattar jańa Konstıtýsııa jobasynda kerisinshe tikeleı bekitilip, kúsheıtilgen.
Ishki ister mınıstrligi Konstıtýsııa jobasyn talqylaý, azamattardyń óz pikirleri men ustanymdaryn bildirýi zań buzýshylyqqa jatpaıtynyn eske salady.
Jaýapkershilik tek qana kórineý jalǵan aqparat taratý jáne faktilerdi ádeıi burmalaý úshin kózdelgen.
Qazirgi ýaqytta, azamattardy jańylystyrýǵa jáne qoǵamdyq ahýaldy turaqsyzdandyrýǵa baǵyttalǵan ózge de jalǵan aqparat taratý faktileri anyqtalýda.
«Biz azamattardy syn turǵysynan oılaýǵa, arandatýǵa ermeýge jáne tek resmı ári tekserilgen aqparat kózderine súıenýge shaqyramyz. Ishki ister mınıstrligi jaǵdaıdy tolyq baqylaýda ustap otyr jáne kez kelgen turaqsyzdandyrý áreketterine qatań den qoıady», dep atap ótti Shyńǵys Alekeshev.
Ishki ister mınıstrligi kórineý jalǵan aqparat taratý men arandatýshylyq áreketter, sebep-saldaryna qaramastan, Qazaqstan Respýblıkasynyń zańnamasyna sáıkes qylmystyq jáne ákimshilik jaýapkershilikke ákep soǵatynyn atap ótti.
Aıta keteıik, 31 qańtar kúni áleýmettik jelilerde Qazaqstan jerin sheteldikterge satý týraly aqparat taraǵan edi. Alaıda, Jalǵan aqparatqa qarsy is-qımyl ortalyǵy Qazaqstan jerin sheteldikterge satý týraly taraǵan aqparattyń shyndyqqa janaspaıtynyn, faktilerdiń burmalanǵanyn málimdedi.
