Foto: diapazon.kz
Aıdarbek Qojanazarov, reformany talqylaý alty aıdan astam ýaqyt boıy júrgizilgenine toqtaldy. Osy kezeń ishinde júzdegen, myńdaǵan azamat óz usynystaryn joldady. Komıssııa músheleri ǵana emes, jurtshylyq ta bul qujatty qazirgi zaman talaptaryna tolyq jaýap beretin, tereń oılastyrylǵan jáne eldiń uzaq merzimdi damý baǵdaryn aıqyndaıtyn mańyzdy qujat retinde baǵalap otyr. Soǵan oraı ol jańa Konstıtýsııanyń jobasyn referendýmǵa shyǵarýdy usyndy.
«Konstıtýsııalyq komıssııanyń múshesi retinde jekelegen baptardyń redaksııasy pysyqtalǵannan keıin jańa Konstıtýsııa jobasyn jalpyhalyqtyq daýys berýge – referendýmǵa shyǵarýdy usynamyn», dedi depýtat.
Konstıtýsııalyq reforma jastarǵa qandaı múmkindikter usynady?
Sondaı-aq, ol ulttyq valıýta mártebesin Ata zańda bekitý týraly da málimdedi. Bul el azamattary tarapynan túsken usynystyń biri. Ulttyq valıýtanyń bolýy – memlekettiń ekonomıkalyq táýelsizdigi men egemendigin aıqyndaıtyn negizgi kórsetkishtiń biri sanalady.
«Ulttyq valıýtanyń mártebesin Konstıtýsııa deńgeıinde bekitý – teńgeniń ınstıtýsıonaldyq mańyzyn naqtylap, qarjy-valıýta aınalymy salasyndaǵy memlekettik saıasattyń sabaqtastyǵyn qamtamasyz etedi. Sonymen qatar, ulttyq valıýtamyzdy Konstıtýsııada bekitý arqyly bolashaqta ártúrli alypqashpa pikirler men alypsatarlyq áńgimelerdiń aldyn alar edik», dep naqtylap ótti depýtat.
Aıdarbek Qojanazarovtyń aıtýynsha, qazir teńge mártebesi zańmen rettelgen. «Qazaqstan Respýblıkasynyń Ulttyq banki týraly» zańǵa sáıkes ulttyq valıýta – teńge. Alaıda álemdik qarjy júıesi ózgerip jatqan jaǵdaıda bul máseleni Konstıtýsııa deńgeıinde naqtylaý asa mańyzdy.
Zańgerler jańa Konstıtýsııanyń tujyrymdamasyn talqyǵa saldy
«Bul – halyqaralyq tájirıbede bar dúnıe. Máselen, Ázerbaıjan Respýblıkasy Konstıtýsııasyna sáıkes, Ázerbaıjan Respýblıkasynyń aqsha birligi retinde manat belgilengen. Sol sııaqty, Armenııa Konstıtýsııasynda ulttyq valıýtanyń armıan dramy ekeni tikeleı jazylǵan. Al Qyrǵyzstan Konstıtýsııasynda ulttyq aqsha birligi som dep naqty kórsetilgen. Sondyqtan Konstıtýsııada «Qazaqstannyń ulttyq valıýtasy – teńge» dep naqty bekitý óte oryndy dep sanaımyn. Osyǵan baılanysty atalǵan túzetýdi Konstıtýsııa jobasyna engizýdi Komıssııa qaraýyna usynamyn», dep túıindedi sózin Májilis depýtaty.
