Erkin kúres sheberleriniń saıysynda jalǵyz Kamıl Krýglıev (97 kg) óner kórsetti. Kil myqtylar jınalǵan jarysta jas darynnyń joly bolmady. Bastapqy básekede Krýglıev majarstandyq Rıchard Vehke ese jiberdi. Al ol óz kezeginde Olımpııa oıyndarynyń jeńimpazy, álemniń úsh dúrkin chempıony, ırandyq Hasan Iаzdanıdiń aldynda dármensizdik tanytty. Sóıtip, jerlesimiz úshin jarys aıaqtaldy.
Áıelder kúresinen ótken básekede qurlyqtyq deńgeıdegi dodalarda júlde alyp júrgen Zeınep Baıanova (50 kg), Irına Kýznesova (62 kg), Gúlmaral Erkebaeva (76 kg) jáne qyzdar arasyndaǵy álem birinshiliginiń jeńimpazy Nılýfar Raımova (57 kg) beldesti. Alǵashqy aınalymda Zeınep reseılik Elızaveta Smırnovaǵa esh qaırat kórsete almady. Irına men Gúlmaral japonııalyq Nonoka Ozakı men Iаsýha Matsýkıden utyldy. Nılfýr úndistandyq Manısha Manıshaǵa ese jiberdi.
Grek-rım kúresinen 27 balýanymyz bozkilemge shyqty. Solardyń arasynan beseýi ǵana jeńis tuǵyryna kóterildi. 50 kg salmaqtaǵy Amanǵalı Bekbolatov pen Erbol Qamalıev úshinshi oryn úshin saıysta álem chempıonatynyń qola júldegeri, Azııanyń eki dúrkin chempıony, japonııalyq Iýı Shıotanı men jastar arasyndaǵy kadetter men jaster arasyndaǵy álem birinshiliginiń fınalısi, ırandyq Sajad Javıd Abbaspoýrganıden aılasyn asyrdy. 72 kg salmaq dárejesinde synǵa túsken Almatbek Amanbek sheshýshi tusta qurlyq chempıony, ózbekstandyq Abror Atabaevty jolynyn yǵystyrdy. 82 kg salmaqtaǵy Ibragım Magomadov amerıkalyq Djessı Porterdi utty. Asa aýyr salmaqtaǵy Oljas Syrlybaı grýzııalyq Ratı Talıkıshvılıden basym tústi.
Joǵaryda esimderi atalǵan jerlesterimizdiń barlyǵy da qola medaldi ıelense, 97 kg salmaqtaǵy Islam Evloevqa kúmis júlde buıyrdy. Jartylaı fınalda álem jáne Eýropa chempıonattarynda eki ret júlde alǵan Serbııanyń ataqty balýany Mıhaıl Kadjaıany qapy qaldyrǵan otandasymyz fınalda álem chempıonatynyń fınalısi, 23 jasqa deıingiler arasyndaǵy álem chempıony, majarstandyq Aleks Shokeden jeńildi.
Bir ókinishtisi, osy jarysqa qatysqan Parıj Olımpıadasynyń kúmis júldegeri Demeý Jadyraev (82 kg), álem chempıony Aıdos Sultanǵalı (63 kg) jáne álem chempıonatynyń júldegerleri Erjet Jarlyqasyn (67 kg) syndy beldi balýandarymyz júldeli oryndardan tys qaldy. Sańlaqtarymyzǵa jańa salmaq jaqpady. Alǵashqy aınylymda Erjet túrkııalyq Murat Fıratqa, shırek fınalda Aıdos moldovalyq Vıtalıı Eremenkoǵa jáne Demeý ırandyq Muhammed Reza Mohtarıdiń osal tusyn taba almady.
