Advokattar alqasy tóraǵasynyń aıtýynsha, advokattar kún saıyn adamdardyń taǵdyrymen, ádildikke degen úmitimen betpe-bet keledi.
«Qaǵazdaǵy zań normalarynyń artynda árdaıym adam ómiri, quqyǵy men bostandyǵy, ataq-abyroıy, otbasy men bolashaǵy turady. Jańa Konstıtýsııada «Zań men Tártip» qaǵıdasy aıqyndaldy. Bul – elimizdiń barlyq quqyqtyq júıesin qamtıtyn qundylyqtardy jıyndyǵy. Árıne «Zań men Tártip» uǵymy qysymdy kúsheıtý nemese erejelerdi qatańdatý degen myǵyna bermeıdi. Bul – eń áýeli, zańdy qurmetteý, zań aldyndaǵy teńdik degen sóz», dedi ol.
Madı Myrzaǵaraev bul qaǵıdanyń azamattardyń quqyqtaryn qorǵaýǵa naqty kepildik beretinin atap ótti. Jańa normalarǵa sáıkes, quqyq qorǵaý organdary adamdy ustaǵan sátten bastap onyń quqyqtaryn túsindirýge mindetti. Ár azamattyń bilikti zań kómegin alý, qamaýǵa alynǵan sátten bastap ózin qorǵaý, kinásizdik prezýmpsııasy saqtalýy sııaqty negizgi kepildikteri aıqyndalady. Sonymen qatar adamdy ózine nemese jaqyndaryna qarsy aıǵaq berýge májbúrleýge jol berilmeıdi.
Spıkerdiń sózinshe, bul – qaǵıdalar advokattar úshin tek deklarasııa emes, zań men zańsyzdyqtyń arasyn aıqyndaıtyn naqty ólshem. Eger azamattarǵa quqyqtary der kezinde túsindirilip, qorǵaýshy iske kedergisiz kirisse, al sot kinásizdik prezýmpsııasyn saqtasa, quqyqtyq júıe tıimdi ári ádil jumys isteı bastaıdy. Sol kezde ádildikke degen senim de naqty ister arqyly nyǵaıady.
Jańa Konstıtýsııada jeke ómir men derekterdi, onyń ishinde sıfrlyq ortadaǵy qupııalylyqty qorǵaý máselesine de erekshe kóńil bólingeni aıtyldy. Bul – qazirgi sıfrlyq qoǵam úshin asa ózekti baǵyttardyń biri.
Eske sala keteıik, búgin Astanada Konstıtýsııalyq reformany qoldaý maqsatynda «Ádiletti jáne Progressıvti Qazaqstannyń Halyqtyq Konstıtýsııasy úshin!» dep atalatyn jalpyulttyq koalısııasy quryldy. Onyń quramyna elimizdegi saıası partııalar, qoǵamdyq uıymdar, depýtattar, zııaly qaýym ókilderi, jastar birlestikteri, kásipodaq uıymdary kirdi.
Jańa Konstıtýsııa jobasy boıynsha referendýmǵa qansha qarajat jumsalady?
