Elimizdiń aıbynyn asqaqtatqan bes arnaıy jasaq komandasy – Memlekettik kúzet qyzmeti, Ulttyq qaýipsizdik komıteti jáne Ishki ister mınıstrligine qarasty tańdaýly bólimsheler halyqaralyq týrnırde, áıgili «Arnaıy jasaq Olımpıadasynda» el namysyn qorǵady.
Bul jarys jetinshi ret Birikken Arab Ámirlikterinde 7-11 aqpan aralyǵynda uıymdastyryldy. Qazaqstan komandalary jarystyń ár kezeńinde joǵary nátıje kórsetip, 48 eldiń 109 komandasyn shań qaptyrdy. Jalpy komandalyq esepte Kaz SWAT Team C birinshi oryndy qanjyǵalasa, al Kaz SWAT Team A ekinshi oryndy ıelendi. Osylaısha, baıraqty básekede el tarıhyndaǵy úzdik nátıje kórsetti.
Sonymen qatar Kaz SWAT Team B segizinshi orynǵa, al Kaz SWAT Team D jıyrmasynshy orynǵa turaqtady.
– Buǵan alǵash ret qatysyp otyrmyn. Eń este qalǵany – jyldamdyq pen temirdeı tártipke qurylǵan úılesimdi áreket. Nátıjeniń kilti start aldyndaǵy salqynqandylyqta jatyr. Jattyǵý barysynda bári jeńil kóringenimen, jarys alańynda jaýapkershilik júgi eki ese artady. Aınala toly kórermen men kamera – ár qımylyń nazarda. Mundaı sátte óz-ózińdi meńgerý, ishki tolqynysty tizgindeý asa mańyzdy. Psıhologııalyq daıyndyq pen komandanyń birligi de sheshýshi ról atqardy. Biz alty aı boıy tynymsyz jattyǵyp, jyldamdyqty shyńdaýǵa, arnaıy taktıkalyq tásilderdi jetildirýge, júgirý men tózimdilikti arttyrýǵa aıryqsha mán berdik, – dedi Kaz SWAT Team C quramynyń múshesi Múslim.
Aıta ketý kerek, Tomiris áıelder komandasy týrnırdiń úzdigi atanyp, keıbir erler komandalaryn artqa qaldyrdy. Buǵan deıin de Qazaqstannyń arnaıy bólimsheleri týrnırlerde júldeli oryn alǵan edi.
Eske salsaq, el Prezıdenti Qasym-Jomart Toqaev Dýbaıda ótken terrorızmge qarsy bólimsheler arasyndaǵy UAE SWAT Challenge – 2026 halyqaralyq jarysynda úzdik nátıjege qol jetkizgen otandyq komandalardy arnaıy quttyqtady.
