Foto: Gov.kz
Qazir qosymshada jalǵan ónim jıi anyqtalatyn dári-dármek, temeki buıymdary jáne aıaq kıim sanaty boıynsha málimetter qoljetimdi. eGov Mobile qosymshasyndaǵy sıfrlyq kod (Data Matrix-kody) skanerlense, taýardyń túpnusqalyǵy, óndirýshisi, negizgi sıpattamalary jáne ónimniń shyǵarylǵan kúni týraly aqparat usynylady.
Qyzmetti paıdalaný úshin:
- eGov Mobile qosymshasynda avtorızasııadan ótip, «Servıster» bólimin ashý kerek;
- «Naqty Onim» servısin tańdap, derekterdi berýge kelisim berý qajet;
- «Bastaý» batyrmasyn basyp, smartfon kamerasyn Data Matrix kodyna baǵyttaý kerek.
Skanerleýden keıin paıdalanýshyǵa tekserý nátıjesi kórsetiledi. Eger sıfrlyq kod bolmasa nemese durys shyqpasa, júıe tıisti habarlamany shyǵarady.
«eGov Mobile qosymshasyndaǵy tekserý fýnksııasy mindetti sıfrlyq tańbalaýǵa jatatyn jáne Data Matrix kody bar taýarlarǵa qoldanylady. Dári-dármekterdi tekserý kezinde ónimniń naqty dárilik preparat sanatyna jatatyny eskeriledi. Sondaı-aq onyń óndirilgen kúni mańyzdy. Sebebi 2024 jylǵy 1 shildege deıin shyǵarylǵan dáriler mindetti sıfrlyq tańbalaýǵa enbeıdi jáne skanerleý kezinde júıede kórinbeýi múmkin. Mundaı jaǵdaıda tekserý nátıjesiniń shyqpaýy taýardyń zańsyz nemese jalǵan ekenin bildirmeıdi», delingen «Ulttyq aqparattyq tehnologııalar» AQ taratqan málimdemede.
Elimizde 2024 jylǵy 1 shildeden bastap shyǵarylǵan dári-dármekter, sondaı-aq barlyq temeki ónimderi men aıaq kıim mindetti túrde sıfrlyq túrde tańbalanady. 2026 jylǵy 1 aqpannan bastap syra men motor maılaryn tańbalaý kezeń-kezeńimen engiziledi, al 2026 jylǵy 1 jeltoqsannan bastap bul tártip jeńil ónerkásip taýarlaryna da qoldanylady.
«Qazir pılottyq rejımde bıologııalyq belsendi qospalar, medısınalyq maqsattaǵy buıymdar, turmystyq hımııa, gaz ballondar jáne ósimdik maıyn tańbalaý synaqtan ótip jatyr. Aldaǵy ýaqytta bul sanattaǵy taýarlardy da zańdylyǵy men túpnusqalyǵyn tekserýge múmkindik paıda bolady», delingen «Ulttyq aqparattyq tehnologııalar» AQ taratqan málimdemede.
Endi kýrsanttardy áskerı oqý oryndaryna qabyldaý eGov arqyly júrgiziledi
Aıta keteıik, jańa fýnksııany Jasandy ıntellekt jáne sıfrlyq damý mınıstrliginiń Memlekettik qyzmetter komıteti, «Ulttyq aqparattyq tehnologııalar» AQ jáne Taýarlardy tańbalaý jáne qadaǵalaý jónindegi biryńǵaı operatory birlesip iske qosqan.
