Atyraýda Nursultan Nazarbaevty qoldaý forýmy ótti

ATYRAÝ. 26 naýryz. Atyraýdaǵy «Nur Otan» partııasy óńirlik fılıaly aldyndaǵy alańda prezıdenttikke kandıdat Nursultan Nazarbaevty qoldaýshylar forýmy ótti. Oǵan óńirdegi kásiporyndar men mekemelerde jumys jasaıtyn munaıshylar men temirjolshylar, etnomádenı birlestikter men jastar uıymdarynyń músheleri, muǵalimder men dárigerler, qarjy salasynyń qyzmetkerlerinen quralǵan eki myńnan astam qoldaýshylar qatysty. Bul týraly egemen.kz tilshisi habarlady. Forýmda aldymen Qazaqstan Respbýlıkasy Prezıdenttigine kandıdat Nursultan Nazarbaevtyń oblystyq qoǵamdyq shtabynyń jetekshisi Beıbit Mamraev sóz alyp, táýelsiz Qazaqstannyń búgingi jetistikteri Elbasy Nursultan Nazarbaevtyń kóregen saıasatynyń, el birligi men halyq yntymaǵynyń jemisi ekenine keńinen toqtaldy. Munaıly óńirde tatýlyq pen turaqtylyqtyń ornyǵýyna úles qosyp júrgen ózge etnostardyń atynan sóz alǵan «Vıdergebýrg» nemis etnomádenı birlestiginiń jetekshisi Aleksandr Dýmler: «Bizdiń elimizde turaqtylyq pen qoǵamdyq kelisim bar. Ekonomıkalyq órkendeý jańa bıikterge jetelep keledi. Jumys oryndary ashylyp jatyr. Jańa kásiporyndar iske qosylýda. Osynyń bári Elbasy Nursultan Nazarbaevtyń eldi birlikke uıystyrǵan, jańa isterge jumyldyrǵan kóregen saıasatynyń jemisi. Biz Elbasynyń saıasatyn qoldaımyz», dedi. Nursultan Nazarbaevtyń kandıdatýrasyn qoldaǵan saıası uıymnyń biri – «Patrıottar» partııasy. Forýmda sóz alǵan atalǵan saıası uıymnyń óńirlik fılıalynyń birinshi hatshysy Aǵıla Moldaǵalıevanyń pikirinshe, Qazaqstan táýelsizdikke ıe bolǵan jyldarda basqa memleketter ǵasyrlar boıy júrip ótken joldy eńserip, qarqyndy damýshy, ekonomıkalyq qýatty memleketke aınaldy. Shara barysynda H.Dosmuhamedov atyndaǵy Atyraý memlekettik ýnıversıtetiniń professory Baqtybek Taýbaev: «Bizdiń bárimizdiń bir Otanymyz bar. Ol –Táýelsiz Qazaqstan. Bizdiń basty baılyǵymyz – Táýelsizdik. Sebebi, halyqqa eń keregi – turaqtylyq pen beıbit ómir. Al Elbasynyń elimiz táýelsizdik alǵaly júrgizip otyrǵan saıasatynyń basty dińgegi – turaqtylyq. Qazaqstan nurly bolashaqqa Nursultan Nazarbaevpen birge jetýdi qalaıdy», dedi. Sonymen birge, bul kúni Atyraý qalasyndaǵy Q.Smaǵulov atyndaǵy alańda jastar men stýdentterdiń Nursultan Nazarbaevty qoldaýǵa arnalǵan fleshmoby ótti. Oblystyq qoǵamdyq shtab músheleri Nursultan Nazarbaevtyń saılaýaldy baǵdarlamasymen tanystyrý úshin «Atyraý jylý-elektr ortalyǵy» AQ-nyń ujymymen kezdesti. Joldasbek Shópeǵul. Derek: egemen.kz. Cýret: Rahym Qoılybaev.