Airbus A320: apat kezinde pılottyń biri kabınada bolmaǵan

ASTANA. 26 naýryz. Nemistiń Germanwings kompanııasynyń Airbus A320 ushaǵy fransýzdyń Alpi taýlary etegine baryp soǵyp, apatqa ushyraǵan kezinde pılottardyń biri kabınada bolmaǵan. Bul týraly Euronews telearnasy habarlady. New York Times gazetiniń habarlaýynsha, Airbus A320 pılottarynyń biri apatqa sanaýly ýaqyt qalǵan shamada kabınadan shyǵyp ketken. «Qara jáshiktegi» jazbadan onyń sodan keıin qaıtyp kabınaǵa kire almaǵany anyq baıqalady. Pılot aldymen esikti aqyryn qaǵady, sosyn qattyraq urady, al sońynan buzyp kirmekshi bolady. Biraq sol kúıi ishke ene almaıdy. «Germanwings avıakompanııasynyń aerobýsy apatqa ushyraǵan máýritte kabınada eki pılottyń bireýi ǵana bolǵan. Ekinshisi qaıǵyly oqıǵadan birneshe mınýt buryn salonǵa shyǵyp ketip, shtýrvalǵa qaıtadan kele almaı qalǵan. Kabınada qalǵan áripesi oǵan esikti ashpaǵan. Pılot sosyn esikti buzyp kirmek bolǵan, biraq qolynan kelmegen. Buǵan laıner apatqa ushyraǵan jerden tabylǵan bort jazbalary málimeti aıǵaq bola alady. Sonymen bir mezgilde osy aqpardy taratýshy New York Times gazeti atyn atamaǵan tergeý ókiliniń sózine silteme jasaı otyryp, ınsıdent aldynda pılottardyń áńgimelerinde dabyl qaǵarlyqtaı eshteńe baıqalmaǵanyn, olardyń ádettegideı sóılesip otyrǵandaryn málimdeıdi», - dep baıandaıdy Euronews jýrnalısi. Bort jazbalary jazylǵan ekinshi «qara jáshik» te tabylǵan. Ol qatty búlingen eken. Onda jad kartasy joq. Qazir sony izdestirý jalǵasyp jatyr. Qaıǵyly oqıǵa bolǵan mańaıǵa keshe, sársenbi kúni Germanııa kansleri Angela Merkel Fransııa prezıdenti Fransýa Ollandpen birge baryp qaıtty. Olar Sen-lez-Alp eldi mekeni janyndaǵy alańqaıda boldy. Bild basylymynyń málimeti boıynsha, ushaqtyń apat aldyndaǵy qozǵalysy týraly esep jarııalanǵan. Qujatqa qaraǵanda, pılottar jergilikti ýaqyt boıynsha 10:30 saǵatta dıspetcherlerden alǵan sońǵy tapsyrmalaryn maquldaǵan. Al 10:31:02-de ruqsatsyz sekýndyna 17,8 metrge jýyq jyldamdyqpen tómen túse bastaǵan. Dıspetcherler sol kezde ekıpajben habarlasýǵa áreket jasaǵan, biraq keri baılanys bolmaǵan, ıaǵnı ushqyshtar jaýap bermeı qoıǵan. 10:35-te bul jaǵdaı ulttyq shuǵyl qyzmetke habarlanǵan. Dıspetcherler 10:40-qa deıin ekıpajben baılanysty qaıta qalpyna keltirýge tyrysyp baqqan. Sodan keıin ushaq radardan kórinbeı ketken. Laınerdiń eń sońǵy jyldamdyǵy 1,890 metr bolǵan. Ázirge izdeýshiler toptary Alpiniń adam aıaǵy basa alatyn jerlerinen adam qańqalaryn izdestirýdi jalǵastyryp jatyr. Murat Aıtqoja.