Otyrysqa qatysýshylarǵa arnaǵan sózinde Premer-mınıstr elde júrgizilip jatqan konstıtýsııalyq reformanyń mańyzdylyǵyna toqtaldy.
«Qazaqstan mańyzdy saıası kezeńnen ótýde. 15 naýryzda bolatyn jalpyhalyqtyq referendýmda azamattar jańa Konstıtýsııanyń jobasy boıynsha daýys beredi. Jańa Konstıtýsııa Prezıdentimiz Qasym-Jomart Toqaevtyń Ádiletti ári Qýatty Qazaqstan qurýǵa baǵyttalǵan aýqymdy saıası reformalaryn aıqyn kórsetedi. Úkimettiń negizgi mindeti – elimizdiń ornyqty ekonomıkalyq ósýin qamtamasyz etý arqyly azamattardyń tabysyn arttyrý jáne ómir súrý sapasyn jaqsartý. Osy maqsatqa jetý úshin jańa ınvestısııalyq sıkldi tolyqqandy iske qosýǵa baǵyttalǵan keshendi sharalar júzege asyrylýda», dedi Úkimet basshysy.
Sonymen qatar 19 aqpanda Vashıngtonda ótken Beıbitshilik keńesiniń alǵashqy otyrysynyń ereksheligine nazar aýdaryldy.
«Keshe Memleket basshysy Beıbitshilik keńesiniń birinshi otyrysyna qatysyp, AQSh Prezıdenti Donald Tramptyń Taıaý Shyǵystaǵy jaǵdaıdy turaqtandyrýǵa baǵyttalǵan bastamasyna qoldaý bildirdi. Qazaqstan Gazany qalpyna keltirý úderisterine qatysýǵa múddeli. Amerıka Qurama Shtattarymen qarym-qatynastardyń ornyqty damýy Qazaqstannyń syrtqy saıasatynyń negizgi baǵyttarynyń biri bolyp qala beredi», dedi O.Bektenov.
Jıynǵa qatysqan AQSh-tyń Qazaqstandaǵy elshisi Djýlı M. Stafft eki el arasyndaǵy baılanystardyń tereńdep kele jatqanyna toqtaldy.
«Prezıdent Qasym-Jomart Toqaevtyń Vashıngtonda jahandyq arenada sóılegen sózi áserli boldy. Biz búginde joǵary deńgeıde ornyqqan ekijaqty qarym-qatynastarymyzdyń odan ári keńeıýin kútemiz. Kommersııalyq yntymaqtastyǵymyz byltyr rekordtyq kórsetkishke jetti. Tek ótken jyldyń 4-toqsanynyń ózinde qazaqstandyq jáne amerıkalyq kompanııalar arasyndaǵy mámileler kólemi 17 mlrd dollarǵa jetti. Bul nátıjeler bizdiń kózqarasymyzdyń bir ekenin jáne eki eldiń ekonomıkalyq ósimin kórsetedi. Onyń ıgiligin halqymyz kórmek, sonymen birge ózara qarym-qatynasymyz nyǵaıa túsedi», dedi AQSh elshisi.
Otyrysta sheteldik ınvestorlarmen yntymaqtastyqty keńeıtý, uzaqmerzimdi kapıtaldy, tehnologııalardy, úzdik halyqaralyq tájirıbelerdi tartý, bızneske ashyq ári boljamdy orta qalyptastyrý máseleleri talqylandy. Investor-kompanııalardyń ókilderi ınvestısııalyq ózara is-qımyldyń oń dınamıkasy men salyq reformasy aıasynda retteletin ortanyń mańyzdylyǵyn atap ótti. Sondaı-aq ınfraqurylymdy damytýǵa, sıfrlandyrýǵa, óndiristi lokalızasııalaýǵa, ozyq tehnologııalardy engizýge, turaqty ekonomıkalyq ósimge baǵyttalǵan uzaqmerzimdi áriptestikti qalyptastyrýǵa basymdyq berildi.
«Sıtıbank Qazaqstan» AQ basqarma tóraǵasy Sáýle Jaqaeva «S5+1» alańdaryndaǵy ýaǵdalastyqtardy jalǵastyrý maqsatynda bıýdjetke salmaq túsirmeı, US EXIM kepildigi arqyly temirjol, avıasııalyq jáne aeronavıgasııalyq ınfraqurylymdy jańǵyrtýǵa qarjy tartylǵanyn aıtty. Onyń aıtýynsha, bul qadam eldiń tehnologııalyq deńgeıi men tranzıttik áleýetin kúsheıtedi.
«Eurasia Group Kazakhstan» bas operasııalyq dırektory Sergeı Glokke Úkimettiń qoldaýymen elimizde John Deere tehnıkasyn óndirýdi lokalızasııalaý, servıstik ınfraqurylymdy keńeıtý men AО́K-te kooperasııany tereńdetý josparlary týraly aıtty. Atap aıtqanda, Túrkistan oblysyndaǵy zaýytta aýyl sharýashylyǵy tehnıkasy men kókónis ósirýge arnalǵan jabdyqtar jelisin ulǵaıtý kózdelgen. Sondaı-aq otandyq mamandar AQSh-taǵy John Deere kásiporyndarynda biliktiligin arttyrady. Sergeı Glokkeniń aıtýynsha, byltyr Memleket basshysy jarııalaǵan Jumysshy mamandyqtary jyly kadrlyq áleýetti kúsheıtýge serpin berdi. Aýyl sharýashylyǵy sekildi jetekshi salalarǵa mamandar daıarlaý basym baǵyt bolyp qala beredi.
«Wabtec Corporation» kompanııasynyń TMD elderi men Mońǵolııadaǵy dalalyq servıster jáne tehnıkalyq qyzmet kórsetý jónindegi vıse-prezıdenti Ǵaını Dúısenova kásiporyndarda sıfrlyq tehnologııalardy engizý arqyly óndiristi keńeıtý josparlaryn bólisti. Elimiz amerıkalyq «Wabtec Corporation» holdınginiń óńirdegi óndiristik seriktesteri arasynda kólemi jaǵynan ekinshi orynda tur. Yntymaqtastyq jyldarynda elde 700-den astam lokomotıv shyǵaryldy. Kásiporynnyń óndiristik qýaty jylyna 100 temirjol tehnıkasyn quraıdy. QTJ-men áriptestik sheńberinde lokomotıvter men dızeldi qozǵaltqyshtardy shyǵarýdy odan ári ulǵaıtý josparlanyp otyr. Elimizde temirjol ınfraqurylymyn damytý, «osal tustardy» joıý boıynsha júrgizilip jatqan aýqymdy jumystardy eskere otyryp, lokomotıv parkin jańartý jáne óndiristik qýattardy keńeıtý eldiń tranzıttik áleýeti men ótkizý qabiletine serpin beredi.
«Freedom Holding Corp.» bas atqarýshy dırektory Tımýr Týrlov «C5+1» forýmy aıasynda OpenAI jáne NVIDIA-men jasalǵan kelisimder elimizge bilim berý men JI-di damytý salasynda túbegeıli jańa múmkindikter ashatynyn aıtty. Onyń aıtýynsha, bul bastamalar sıfrlyq ekonomıkaǵa kadrlardy júıeli daıarlaýdy kózdeıdi ári Pavlodar oblysyndaǵy «Derekterdi óńdeý ortalyǵy alqaby» jobasyn qosa alǵanda, zamanaýı esepteý ınfraqurylymyn qalyptastyrýǵa negiz bola alady.
«Deloitte Kazakhstan» kompanııasynyń salyq praktıkasy jónindegi seriktesi Eldos Syzdyqov elde júrgizilip jatqan salyq reformasy aıasynda qabyldanǵan ózgeristerge oń baǵa berdi. Sonymen qatar QQS-ty ýaqtyly qaıtarmaǵany úshin ósimpuldy ýaqytsha alyp tastaý men ákimshilendirý rásimderin jetildirý teńgerimdi sıpatqa ıe ekenin, al jańa normalar ashyqtyqty arttyrýǵa, iskerlik ortany nyǵaıtýǵa baǵyttalǵanyn atap ótti. Jalpy, arnaıy salyq rejimderiniń parametrlerin qaıta qaraý, eń aldymen, teńgerimsizdikterdi joıýǵa, salyq salýdyń ádil júıesin qalyptastyrýǵa baǵyttalǵan.
Kóterilgen máselelerge qatysty Qarjy jáne Syrtqy ister mınıstrlikteriniń basshylary óz pikirin bildirdi.
О́z kezeginde Premer-mınıstr Oljas Bektenov halyqaralyq áriptestermen yntymaqtastyqty odan ári nyǵaıtýǵa jáne qolaıly ınvestısııalyq ahýal qurýǵa beıildi ekenin atap ótti. Jahandyq tehnologııalyq tizbekterdi qalyptastyrý aıasynda Úkimet halyqaralyq tehnologııalyq kompanııalardy yntymaqtastyqqa tartýǵa, serpindi sıfrlyq jobalardy júzege asyrý úshin ınfraqurylym qurýǵa basymdyq beredi. Otyrys qorytyndysynda jaýapty memlekettik organdarǵa Amerıka saýda palatasymen birlesip aldaǵy jumystarda jıynda aıtylǵan bastamalar men bıznes usynymdaryn eskerý tapsyryldy.
