Foto: Kólik mınıstrligi
Qaladaǵy Ábilqaıyr han men Saǵadat Nurmaǵambetov kósheleriniń qıylysynda otandyq NAZAR avtonomdy jaıaý júrginshiler ótkeli paıdalanýǵa berildi. Júıe jaıaý júrginshi anyqtalǵan sátte avtomatty túrde iske qosylyp, qosymsha jaryqtandyrýdy jáne jol betine stop-syzyqtyń jaryq proeksııasyn shyǵarady.
Ásirese qarańǵy ýaqytta ótkeldiń kórinýin aıtarlyqtaı arttyryp, joldy kesip ótý qaýpi týyndaǵan sátte júrgizýshilerdiń nazaryn kúsheıtedi. Iаǵnı, tehnologııa adamdy qaǵyp ketý táýekelin azaıtýǵa baǵyttalǵan.
Byltyr Qyzylordada jaıaý júrginshiler erejeni neshe ret buzǵan?
Ǵylymı súıemeldeý jáne monıtorıng
Jobany engizýge ǵylymı-tehnıkalyq súıemeldeýdi Qazaqstan jol ǵylymı-zertteý ınstıtýty (QazjolǴZI) júzege asyryp jatyr. Instıtýt mamandary atalǵan ýchaskede turaqty monıtorıng júrgizip, kólik quraldarynyń qozǵalys parametrlerin taldaıdy jáne nysannyń qoldanystaǵy normatıvtik talaptarǵa sáıkestigin tekseredi.
QazjolǴZI bas mamany Zakırjan Danııardyń aıtýynsha, júıe ornatylǵannan keıin júrgizýshilerdiń minez-qulqy jan-jaqty baǵalanady.
«Kólik aǵynynyń jyldamdyǵyn, yqtımal qaqtyǵys jaǵdaılarynyń sanyn jáne ótkeldi paıdalaný qarqyndylyǵyn tirkeımiz. Monıtorıng qorytyndysy boıynsha bul sheshimniń tıimdiligine obektıvti baǵa beriledi», dedi ol.
JKO-ny azaıtýǵa baǵyttalǵan qadam
Salalyq qurylymdardyń derekterine sáıkes, jol-kólik oqıǵalarynyń eń jıi kezdesetin túrleriniń biri – jaıaý júrginshini qaǵyp ketý. Mundaı jaǵdaılarǵa kóbine jaryqtandyrýdyń jetkiliksizdigi jáne rettelmeıtin ótkelderdiń kózge anyq túspeýi sebep bolady.
Instıtýt sarapshylarynyń halyqaralyq tájirıbeni taldaýyna súıengen baǵalaýy boıynsha, belsendi jaryqtyq ındıkasııany qoldaný jaıaý júrginshini qaǵyp ketý oqıǵalaryn orta eseppen 30-40%-ǵa deıin azaıtýy múmkin.
Qazir joba praktıkalyq synaq kezeńinen ótip jatyr. Jınalǵan derekter saraptalǵannan keıin respýblıkalyq jáne jergilikti mańyzy bar avtomobıl joldary jelisinde osyndaı avtonomdy ótkelderdi kezeń-kezeńimen engizý múmkindigi qarastyrylady.
