Foto: ashyq derekkóz
Aksııa kezeńinde saýda sýbektileri azyq-túlik jáne azyq-túlik emes taýarlarǵa 10-70 paıyz aralyǵynda jeńildikter usynady. Aksııalyq ónimder saýda zaldarynda arnaıy merekelik navıgasııa jáne «Nauryz» fırmalyq bezendirýi arqyly belgilenedi. Taqyryptyq baǵa belgileri, brendtelgen kórsetkishter, bannerler men basqa da POS-materıaldar satyp alýshylarǵa jeńildikpen usynylǵan taýarlardy ońaı tabýǵa múmkindik beredi.
Jalpy aksııaǵa ishki saýda salasynyń shamamen 300 sýbektisi qatysady. Onyń ishinde 140 saýda úıi men saýda-oıyn-saýyq ortalyǵy, 140 saýda jelisi jáne 20 elektrondyq saýda platformasy bar. Qatysýshylar qatarynda Magnum, Small, Galmart, «Anvar», «Dına», Toimart, «Astyqjan», «Aıan», Greenwich sekildi iri saýda jelileri, sondaı-aq Mega Silk Way, Keruen, Keruen City, «Arýjan», «Saryarka», Shymkent Plaza sııaqty saýda-oıyn-saýyq ortalyqtary bar.
Aksııa aıasynda elimizdiń óndirýshilerin qoldaýǵa aıryqsha kóńil bólinedi. Saýda ortalyqtarynda otandyq ónimderge arnalǵan arnaıy satý aımaqtary uıymdastyrylady. Bul alańdarda usynylatyn taýarlar naryqtaǵy baǵadan orta eseppen 10-20 paıyzǵa tómen baǵamen satylady.
Merekelik saýdamen qatar kelýshilerge arnalǵan mádenı ári ınteraktıvti baǵdarlama da ázirlengen. Eldiń iri saýda-oıyn-saýyq ortalyqtarynda ulttyq naqyshtaǵy fotozonalar ornatylady. Seriktestik aıasynda Qazaqstan boıynsha 11 saýda núktesi bar «Tárbıe» ulttyq kıim dúkeni kelýshilerge ulttyq úlgidegi kıimderdi usynyp, olardy kıip kórip, estelik sýretke túsýge múmkindik beredi. Mundaı aımaqtardy Aqtaýdaǵy SAYA Mall, Petropavldaǵy Dostyk Mall, Aqtóbedegi KeruenCity, Astanadaǵy Keruen City Astana, Atyraýdaǵy Infinity Mall, Túrkistandaǵy Turan Mall, Almatydaǵy Dostyk Plaza jáne Shymkenttegi Shymkent City Mall saýda ortalyqtarynda ornalastyrý josparlanǵan.
Sonymen qatar Naýryz merekesine oraı Saýda jáne ıntegrasııa mınıstrligi «Sauda in Digital Nauryz» respýblıkalyq konkýrsyn ótkizedi. Baıqaý 2026 jylǵy 13-20 naýryz aralyǵynda ótedi. Onyń maqsaty – saýda nysandaryn merekelik bezendirýde sıfrlyq sheshimderdi engizý jáne ınnovasııalyq servısterdi damytý.
Qatysýshylar jobalaryn tórt nomınasııa boıynsha usyna alady: «Úzdik sıfrlyq bezendirý», «Úzdik sıfrlyq quttyqtaý», «Jasandy ıntellektini úzdik paıdalaný» jáne «Eń kreatıvti Digital-joba». Baıqaýǵa qatysý úshin Instagram jelisinde #saudadigitalnauryz heshtegimen beınerolık jarııalap, Saýda jáne ıntegrasııa mınıstrliginiń resmı paraqshasyn belgileý qajet.
Jeńimpazdardy saraptamalyq komıssııa kreatıv, jasandy ıntellekt tehnologııalaryn qoldaný deńgeıi, ulttyq biregeılik, aýdıtorııanyń belsendiligi jáne jobanyń oryndalý sapasy boıynsha anyqtaıdy. Konkýrs qorytyndysy 2026 jylǵy 20 naýryzda jarııalanyp, úzdik jobalar saltanatty túrde marapattalady.
Týrıstik maýsymnyń ashylýy: Naýryzda eki mańyzdy is-shara ótedi
