Aldaǵy ýaqytta muǵalimderdiń kúndelikti jumysyna jańa sıfrlyq qural engiziledi. ChatGPT Edu dep atalatyn júıe pedagogterge sabaqqa daıyndalýdy jeńildetýge arnalǵan. Bul qural arqyly muǵalimder birneshe mınýt ishinde sabaq josparyn jasap, testter men túrli tapsyrmalar qurastyra alady. Sonymen qatar oqý materıaldaryn oqýshylardyń bilim deńgeıine qaraı beıimdeýge múmkindik týady.
Joba aıasynda OpenAI kompanııasy elimizge 100 myń lısenzııa bólmek. Onyń ishinde 5 myń lısenzııa mektepke deıingi uıymdarǵa, 85 myń lısenzııa orta bilim berý uıymdaryna, al 10 myń lısenzııa kolledjderge beriledi. Jyldyń ekinshi jartysynda lısenzııalar qaıta bólinip, taǵy 100 myń pedagogke qoljetimdi bolady. Osylaısha jalpy sany 200 myń muǵalim jasandy ıntellekt quralyn paıdalana alady.
DeepSeek pen ChatGPT-di jalǵan nusqalardan qalaı ajyratýǵa bolady?
Mınıstrlik taratqan málimetke sáıkes, ár muǵalimniń óz «aqyldy assıstenti» bolady. ChatGPT Edu muǵalimderge sabaq josparyn daıyndaýǵa, túrli tapsyrmalar men testter qurastyrýǵa, sondaı-aq oqý materıaldaryn ártúrli deńgeıdegi oqýshylarǵa beıimdeýge kómektesedi. Sonymen qatar pedagogter tapsyrmalardy qazaq, orys jáne aǵylshyn tilderinde ázirleı alady.
«ChatGPT Edu muǵalimderge kúndelikti jumysty jeńildetýge kómektesedi. Mysaly, birneshe mınýttyń ishinde sabaq josparyn daıyndaýǵa, túrli tapsyrmalar men testter qurastyrýǵa múmkindik beredi. Sonymen qatar oqý materıaldaryn ártúrli deńgeıdegi oqýshylarǵa beıimdep jasaýǵa bolady. Muǵalimder tapsyrmalardy qazaq, orys jáne aǵylshyn tilderinde ázirleı alady. Sabaq barysynda da bul qural paıdaly bolmaq. Ol kúrdeli taqyryptardy qarapaıym tilmen túsindirýge, ómirden alynǵan mysaldardy qoldanýǵa kómektesedi. Sondaı-aq sabaqtardy talqylaý, birlesken jobalar nemese zertteý jumystary formatynda ótkizýge múmkindik beredi», delingen mınıstrlik habarlamasynda.
Jasandy ıntellekt júıesi muǵalimderge tek sabaq daıyndaýda ǵana emes, oqýshylardyń jumystaryn baǵalaý kezinde de kómek kórsetedi. Mysaly, baǵalaý krıterıılerin qurastyrýǵa kómektesip, oqýshylardyń tapsyrmalaryn aldyn ala taldaı alady. Degenmen sońǵy baǵany qoıý quqyǵy muǵalimniń ózinde qalady.
Qazirgi ýaqytta Oqý-aǵartý mınıstrligi pılottyq jobany resmı túrde iske qosýǵa daıyndalyp jatyr. Aıta ketý kerek, bıyl qańtar aıynda Qazaqstan OpenAI kompanııasynyń Education for Countries halyqaralyq baǵdarlamasynyń alǵashqy qatysýshylarynyń qataryna endi. Jasandy ıntellekt jáne sıfrlyq damý mınıstrliginiń málimetinshe, bul joba memlekettik bıýdjetten nemese syrtqy granttardan qarjylandyrylmaıdy. Joba jeke qarajat esebinen júzege asyrylady.
