Jıyndy ashqan Ulttyq mýzeıdiń dırektory Berik Ábdiǵalıuly atalǵan ult qaıratkerleriniń mereıtoıy eskerýsiz qalmaý kerek ekenin aıta kelip, olardyń atqarǵan isterine qysqasha toqtaldy. Sondaı-aq ol Ulttyq mýzeıdiń Alashqa arnalǵan bólimi qaıta jańǵyrtylyp jatqanyn, Alashorda úkimeti músheleri men Alash jetekshisi Álıhan Bókeıhanǵa arnalǵan jeke stend ashylatynyn jetkizdi.
Alashtanýshy ǵalym Tursyn Jurtbaı Alash qaıratkerleriniń ult bolyp uıysý jolyndaǵy eńbekterine tereńirek toqtaldy. «Birtutas Alash ustanymy» taqyrybynda sóılegen ǵalym: «Bir ult ortaq maqsatqa jumylmaı, birlikke jetpeıdi. Biz atyn atap otyrǵan úsh tulǵa da osy ortaq maqsatqa birige bildi», deı kelip, Álıhan, Álimhan jáne Qoshkeniń qaıratkerlik qyryna qatysty tyń derekterdi bólisti.
«Qazaq gazetteri» seriktestiginiń bas dırektory, alashtanýshy ǵalym Dıhan Qamzabekuly Alash muraty taqyrybynda oı qozǵady. Ol Alash qaıratkerlerimen shyǵarmashylyq baılanysta bolǵan nemis professory Maks Kýchınskııdiń eńbegine toqtalyp, sheteldik ǵalymnyń Alash kósemi Álıhan Bókeıhanmen tanys bolǵanyn, 1924 jyly Qarqaraly, Semeı óńirinde ekspedısııa júrgizgen kezinde Qoshke Kemeńgeruly, Álimhan Ermekulymen júzdeskenin aıtyp, atalǵan tulǵalardyń ortaq tusyna qatysty qundy derekter keltirdi.
Dóńgelek ústelde L.N.Gýmılev atyndaǵy EUÝ-dyń professory Sherýbaı Qurmanbaıuly «Álıhan Bókeıhan jáne kitap syny» degen taqyrypta baıandama jasady. Ǵalym Alash kóshbasshysynyń «Kúnshyǵys» baspasynan shyqqan kitaptaryna jazǵan resenzııalaryn taldady. Ol Álıhannyń kitaptarǵa jazǵan 18 resenzııasyn súzip shyǵyp, sonyń ishinde Iý.Vagnerdiń sý, áýe, jer, janýarlar týraly kitaptarynyń qazaq tilindegi aýdarmalaryn synǵa alǵanyn, usynys-pikirin bildirgenin atap ótti. Sherýbaı Qurmanbaıuly baıandamasyn «Orystyń kitabyn qazaqqa dep ózgertkende Krylovtyń basyna tymaq kıgizgen Ahmetti de umytpaý kerek» degen sózimen túıindedi.
Sonymen qatar jıynda ǵalymdar Marat Ábsemet, Aıgúl Ismaqova, Sultan Han Aqquly, Qaıyrbek Kemeńger, sondaı-aq Álimhan jáne Qoshkeniń urpaqtary sóz alyp, Alash qaıratkerleriniń qajyr-qaıratqa toly taǵylymdy ǵumyry Hám qazaq rýhanııatyna qosqan úlesi týraly aıtyp, olardyń eńbekterin jan-jaqty nasıhattady.
