«Ulttyq kıim – halqymyzdyń ǵasyrlar boıy qalyptasqan estetıkalyq talǵamyn, dúnıetanymyn, bolmys-bitimin aıshyqtaıtyn asyl mura. Kıim úlgilerindegi oıý-órnek, zergerlik áshekeı, keste men beder qazaq halqynyń rýhanı baılyǵy men mádenı bolmysynan syr shertedi. Is-sharanyń basty maqsaty – osy qundylyqtardy keńinen nasıhattap, ulttyq kıim úlgilerin zaman talabyna saı jańǵyrtý jáne olardy kúndelikti sán keńistiginde dáripteý», deıdi «Abai TV» telearnasynyń dırektory Azamat Keńesuly.
Merekelik baǵdarlama ulttyq jáne zamanaýı etno mýzykamen bastalyp, kópshilikke erekshe áser syılady. Is-sharada «Saraıshyq» etnoansambli mýzykalyq popýrrı oryndap, mýltıınstrýmentalıst Edil Qusaıynov etno áýenderimen keshtiń kórkin asha tústi. Sondaı-aq dástúrli án óneriniń ókilderi Aıgúl Elshibaeva men Jazgúl Dańylbaeva sahnada óner kórsetti.
Al ulttyq kıimder sherýinde otandyq dızaınerler, ánshiler, «Qazaqstan» telearnasynyń júrgizýshileri Nurbek Bekbaý, Armangúl Toqtamurat, Irına Ten, Beksultan Ákimjan, sondaı-aq «Qazaqstan» teleradıokorporasııasynyń qyzmetkerleri men qala turǵyndary belsene qatysty. Úkili kámshat pen búrmeli kóılek kıgen arýlar, aq kımeshekti ájeler men shapan jamylǵan jigitterden quralǵan 230 adamdyq top saýda ortalyǵyn aralap, halyq ánderin shyrqady.
Elordadaǵy eń úlken saýda oıyn-saýyq ortalyǵynda ótken merekelik is-sharada «Umaı ana» kolleksııasy, «Ádemi-aı», «Jaras» sán klýby, «Quralaı», «Han», «Nazım», «Dástúr», «Asah», «Qazaq ordasy» syndy sán ortalyqtarynyń ulttyq úlgidegi kıimderi kópshilik nazaryna usynyldy.
