Foto: Qazaqstannyń Sankt-Peterbýrg qalasyndaǵy Bas konsýldyǵy
2026 jylǵy 28 naýryzda konsýldyq qyzmetkerleri atalǵan kentte eńbek etip júrgen Qazaqstan azamattarymen, sonyń ishinde turmystyq janjal saldarynan ustalǵan azamattarmen kezdesý ótkizdi. Ýst-Lýgadaǵy vahtalyq kentte shamamen 15 myńǵa jýyq adam turady, olardyń barlyǵy Reseıdegi iri eksporttyq port qurylysyna tartylǵan túrli merdiger uıymdardyń qyzmetkerleri.
Aldyn ala málimetke sáıkes, tártipsizdikterge birneshe júz adam qatysqan. Oqıǵadan keıin ártúrli elderdiń 30-dan astam azamaty ustaldy. Tergeýdiń bastapqy kezeńi aıaqtalǵan soń, ustalǵandardyń basym bóligi bosatylǵan. Degenmen, birqatar azamattarǵa, onyń ishinde Qazaqstan azamattaryna qatysty 10 táýlikke ákimshilik qamaý týraly sot sheshimi shyqty. Sonymen qatar Qazaqstannyń taǵy 3 azamatyna qatysty tergeý amaldary jalǵasyp jatyr.
Konsýldyqtyń málimetinshe, Qazaqstan azamattary arasynda zardap shekkender nemese medısınalyq kómekke muqtaj jandar joq. Barlyq azamattarǵa qajetti konsýldyq-quqyqtyq kómek tolyq kólemde kórsetilip otyr.
Oqıǵadan keıin vahtalyq kenttiń ózinde arnaıy kezdesý uıymdastyrylyp, oǵan kompanııa qyzmetkerleri, otandyq jumysshylar men ýchaske brıgadırleri, Reseı Federasııasynyń quqyq qorǵaý organdary, jumys berýshi jáne kúzet uıymdarynyń ókilderi qatysty. Jıynda oryn alǵan jaǵdaı jan-jaqty talqylanyp, osyndaı keleńsizdikterdiń aldyn alý sharalary qarastyryldy.
Qazirgi ýaqytta vahtalyq kenttegi ahýal turaqty. Oqıǵaǵa qatysqan taraptarǵa qatysty tergeý is-sharalary jalǵasyp jatyr. Onyń qorytyndysy boıynsha janjalǵa qatysýshylardyń áreketterine quqyqtyq baǵa beriledi.
Reseıde qazaqstandyqtar qatysqan jappaı tóbeles jaıly jańa derekter shyqty
