Atap aıtqanda, 4,1 myń shetel azamaty elde bolý erejelerin buzǵany úshin ákimshilik jaýapkershilikke tartyldy. 2,7 myń adam zańsyz eńbek qyzmetin júzege asyrǵan. 2,2 myń Qazaqstan azamaty men zańdy tulǵa sheteldikter týraly polısııaǵa ýaqytyly habar bermegen. 500-den astam jumys berýshi sheteldik jumys kúshin zańsyz paıdalanǵan.
Salynǵan aıyppuldardyń jalpy kólemi 200 mıllıon teńgeden asty. Sonymen qatar, zań buzǵan nemese elde bolý negizderi joıylǵan 1,5 myń shetel azamatynyń Qazaqstanda bolý merzimi qysqartyldy.
Kóshi-qon zańnamasyn buzǵan 132 sheteldik el aýmaǵynan shyǵaryldy
Sot sheshimimen 1,2 myń shetel azamatyn elden shyǵarý týraly qaýly qabyldandy. Olardyń ishinde 121 adam májbúrli túrde elden shyǵaryldy, sonyń 8-i radıkaldy kózqarastaǵy tulǵalar. Barlyq shyǵarylǵan azamattarǵa Qazaqstanǵa 5 jylǵa kirýge tyıym salyndy.
Is-shara barysynda 24 qylmystyq is qozǵaldy:
- 9 is – memlekettik shekarany zańsyz kesip ótý boıynsha;
- 9 is – zańsyz kóshi-qondy uıymdastyrý faktileri boıynsha;
- 6 is – sheteldik jumys kúshin tartý tártibin buzý boıynsha.
Taldaý nátıjesinde, kóshi-qon zańnamasynyń buzylýyna kóbinese Qazaqstan azamattarynyń ózderi yqpal etetini anyqtaldy. Negizgi sebep – zańsyz jolmen tez tabys tabýǵa umtylý.
Mysaly, Shymkent qalasynda, sondaı-aq Almaty, Jambyl jáne Shyǵys Qazaqstan oblystarynda sheteldik jumys kúshin tartý erejelerin birneshe ret buzý faktileri tirkeldi. Bul derekter boıynsha Qylmystyq kodekstiń 395-baby 1-bóligine sáıkes sotqa deıingi tergeý bastaldy.
Sonymen qatar, bir óńirde Qazaqstan azamaty jalǵan qujattar arqyly sheteldikterdi zańdastyrǵany anyqtaldy. Atalǵan fakti boıynsha Qylmystyq kodekstiń 394-baby boıynsha is qozǵaldy.
Is-shara kezinde halyqaralyq izdeýde júrgen 22 shetel azamaty ustaldy. Olardyń keıbiri Almaty qalasynda, Mańǵystaý, Túrkistan jáne Jambyl oblystarynda anyqtalǵan.
Quqyq qorǵaý organdary kóshi-qon zańnamasynyń buzylýyn anyqtaý jáne aldyn alý jumystaryn jalǵastyryp jatyr. Negizgi qaǵıda – zań bárine ortaq jáne ony saqtaý mindetti.
