Tek bıylǵy úsh aıdyń ózinde 56,8 myń azamat kásiptik oqytý platformasyna jazylǵan. Platforma iske qosylǵaly 1 mln 200 myń adam oqýdan ótti. Oqýdy aıaqtaǵan 16,7 myń jumyssyz azamattyń ishinde 16–35 jas aralyǵyndaǵy jastardyń úlesi basym. Atap aıtqanda, Shymkent qalasynan – 2 172, Aqtóbe oblysynan – 2 125, Túrkistan oblysynan – 1 446, Qyzylorda oblysynan – 1 342, Qostanaı oblysynan – 1 304 adam.
Platformada avtorlardyń ártúrli baǵytty qamtıtyn 581 kýrsy jarııalanǵan, onyń 395-i tegin. Sondaı-aq odan ári oqýdy jalǵastyrǵysy keletinderge bilim berý alańdaryna aýysý múmkindigin usynatyn «Fluent Education» men «Iаndeks Qazaqstan» seriktesteriniń kýrstary bar. Kýrstardyń uzaqtyǵy – 2–72 saǵat.
Platformada áleýmettik qyzmet kórsetýmen birge ózge salalardaǵy túrli mamandyqqa baýlıtyn tegin kýrstar sany únemi artyp keledi. Onlaın oqytý platformasy halyqtyń bilim deńgeıi men kásibıligin arttyrýǵa, mansaptyq damýdy yntalandyryp, «ómir boıy oqytý» tujyrymdamasyn ilgeriletýge baǵyttalǵan. Bilim alýshy oqytýdyń qolaıly tásili men tilin, materıaldy berýdiń yńǵaıly prınsıpin ózi tańdap, bilim úderisinde qabilet-qarymyn baqylaı alady. Oqý aıaqtalǵannan keıin bilim alýshy 70%-dyq shekti deńgeımen testileýden ótedi. Onlaın kýrsty sátti aıaqtaǵandarǵa daǵdylardy ıgerýi týraly sertıfıkat beriledi. Sertıfıkatty júkteý kezinde ıgergen mamandyǵyna saı Enbek.kz-te bos jumys oryndaryn usyný fýnksııasy iske qosylady. Sertıfıkat Enbek.kz-te tirkelgen kezde bilim alýshynyń túıindemesinde avtomatty túrde kórsetiledi. Qyzmetkerlerdi izdeý kezinde áleýetti jumys berýshi Platformada oqýdy sátti aıaqtaǵan sertıfıkat ıelerin kóre alady.
Platformada onlaın kýrstardy avtorlar men ázirleýshiler tegin ornalastyrady. Kýrstardy memlekettik, orys, aǵylshyn tilderinde júkteýge bolady. Aqparat ártúrli formatta: mátin, tanystyrylym, beıne, aýdıo materıaldar, ınfografıka, basqa da ádistermen berilýge tıis. Kýrs avtorlaryna da platforma tıimdi. Sebebi yńǵaıly sabaq qurastyrý, jarııalanǵan kýrstardyń statıstıkasy men tıimdiligin qaraý, sertıfıkattardy túrli dızaında jasaý, sondaı-aq oqý qunyn aldyn ala esepteýge arnalǵan onlaın-kalkýlıatordy qoldaný múmkindigi bar.
