Is-sharanyń basty maqsaty – qorshaǵan ortany qorǵaý, ýnıversıtet aýmaǵyn abattandyrý jáne ekologııalyq mádenıetti qalyptastyrý.
Senbilikke ýnıversıtettiń barlyq fakýltetteri, ınstıtýttary men mektepteri belsendi túrde jumyldyryldy. Aldyn ala tazalyq jumystary júrgiziletin negizgi aýmaqtar belgilenip, qatysýshylar birlese jumys atqardy. Atap aıtqanda, ýnıversıtet aýmaǵyn jáne stýdenttik jataqhanalarǵa jaqyn jerlerdi qoqystan tazartyp, stýdenttik sport ortalyǵynyń mańyna aǵash kóshetteri otyrǵyzyldy. Ýnıversıtet ákimshiligi senbilikti uıymdastyrýmen qatar, qatysýshylar úshin jaıly ári kóterińki kóńil kúı qalyptastyrýǵa da erekshe mán berdi.
«Taza Qazaqstan»: Almatyda 550-den astam adam senbilikke shyqty
Aksııaǵa Eýrazııa ulttyq ýnıversıtetiniń Basqarma tóraǵasy – rektor Erlan Sydyqov ta qatysty. Ol mundaı bastamalardyń stýdenttik ortada ekologııalyq mádenıetti qalyptastyrýdaǵy mańyzyn atap ótti.
− «Taza Qazaqstan» respýblıkalyq aksııasyn júzege asyrý – Memleket basshysy erekshe nazar aýdaratyn ekologııalyq jaýapty qoǵam qalyptastyrýdaǵy mańyzdy qadam. Eýrazııa ulttyq ýnıversıteti stýdentter men qyzmetkerlerdi turaqty damý qundylyqtary tóńireginde biriktiretin osyndaı bastamalardy qoldaıdy. Stýdentterdiń «Taza Qazaqstan» aksııasyna qatysýy olardyń sanaly ustanymyn jáne qoǵamnyń ekologııalyq mádenıetin damytýǵa úles qosýǵa daıyn ekenin kórsetedi, − dedi EUÝ rektory Erlan Sydyqov.
Rektor stýdentter men ýnıversıtet qyzmetkerlerimen birge aǵash kóshetterin otyrǵyzyp, qorshaǵan ortaǵa uqypty qaraýdyń mańyzyn jeke úlgisimen kórsetti.
«Mundaı aksııalar tek ekologııa turǵysynan ǵana emes, jalpy mádenıet pen jaýapkershiliktiń kórinisi retinde de mańyzdy. Stýdenttermen jáne áriptestermen birge qatysqanda, birlik pen úlken iske qatystylyq sezimi paıda bolady, bul shynymen de shabyttandyrady», dep atap ótti Kólik-energetıka fakýltetiniń dekany О́mirjan Qoqaev.
Qatysýshylar úshin bul jaı ǵana senbilik emes, ekologııaǵa óz úlesin qosý múmkindigi boldy. Stýdentterdiń aıtýynsha, mundaı sharalar adamdardy biriktirip qana qoımaı, komandalyq rýhty nyǵaıtady, qorshaǵan ortaǵa uqypty qaraýǵa jáne kúndelikti ómirde tazalyqty saqtaýǵa yntalandyrady.
«Senbilikke qatysý men úshin óte mańyzdy ári paıdaly tájirıbe boldy. Biz tek ýnıversıtet aýmaǵyn tazalap qana qoımaı, tabıǵatqa degen jaýapkershiligimizdi arttyrdyq. Osyndaı sharalar stýdentterdi biriktirip, ortaq iske jumyldyrady. Bolashaqta da mundaı ıgi bastamalarǵa belsendi túrde qatysamyn», dedi Zań fakýltetiniń 2 kýrs stýdenti Gúlmarjan Ibragımova.
Eýrazııa ulttyq ýnıversıtetinde turaqty damý men ekologııalyq jaýapkershilik máselelerine erekshe kóńil bólinedi. Ýnıversıtet «Taza Qazaqstan» respýblıkalyq aksııasyna belsendi qatysyp qana qoımaı, ekologııalyq mádenıetti qalyptastyrýǵa baǵyttalǵan óz bastamalaryn da júzege asyryp keledi. EUÝ-da turaqty damý saıasaty bekitilgen, onyń aıasynda stýdentter men oqytýshylar qoıylǵan maqsattarǵa jetýge baǵyttalǵan is-sharalardy turaqty túrde ótkizedi. Mundaı ıgi sharalar jastardyń azamattyq jaýapkershiligin arttyryp qana qoımaı, el tazalyǵy – ulttyq mádenıettiń aınasy ekenin dáleldeıdi. EUÝ ujymy aldaǵy ýaqytta da ekologııalyq bastamalardy qoldap, senbilik jumystaryn turaqty túrde jalǵastyrýdy josparlap otyr.
