19 sáýir kúni ómirden ozǵan qalamgerdiń jary Hanshaıym Shahanovanyń áleýmettik jelide taraǵan hatyna sáıkes, aqynnyń sońǵy tilegi – ózin Arystan bab kesenesiniń mańyna jerleý bolǵan. Alaıda keıin belgili bolǵandaı, Muhtar Shahanov 21 sáýir kúni Almaty qalasyndaǵy Keńsaı zıratyna jerlenedi.
Memleket basshysy Muhtar Shahanovtyń otbasyna kóńil aıtý jedelhatyn joldady
Bul máselege qatysty qoǵamda ártúrli kózqaras qalyptasyp, birqatar belsendiler óz pikirin bildirdi. Osyǵan baılanysty Mádenıet jáne aqparat mınıstri Aıda Balaeva resmı túsinikteme berdi.
Mınıstrdiń aıtýynsha, Arystan bab kesenesi – búginde tek zııarat orny ǵana emes, memleket qorǵaýyndaǵy tarıhı-mádenı mura jáne týrıstik nysan. Sondyqtan onyń aýmaǵynda jańa zırattar qazý orynsyz.
«Búginde Arystan bab kesenesi de, ony qorshaǵan eski qorym da memlekettiń qorǵaýyndaǵy nysandar. Iá, buryn zııarat etetin jer bolsa, qazir bul – tarıhı muramyz. Arystan bab panteon-zıraty emes, ol eń aldymen úlken mádenı-rýhanı ortalyq, týrıstik baǵytqa engen tarıhı-mádenı nysan. Sondyqtan ol jerge jańa zırattar qazý adamı turǵydan da, dinı turǵydan da durys emes dep sanaımyz», dedi Aıda Balaeva azattyq-ruhy.kz saıtyna bergen pikirinde.
Sonymen qatar mınıstr Muhtar Shahanovtyń tulǵa retinde qalyptasýyna Almaty qalasynyń erekshe yqpal etkenin atap ótti. Onyń sózinshe, aqynnyń shyǵarmashylyq ortasy men zııaly qaýym shoǵyrlanǵan qala – Almaty, al Keńsaı zıraty – kóptegen kórnekti tulǵalar máńgilik tynys tapqan oryn.
«Aqynnyń artynan izdep, duǵa jasaıtyn jamaǵat ulylaryn Keńsaıdan tabady. Týystary da bul sheshimge túsinistikpen qaraıdy dep senemiz», dedi vedomstvo basshysy.
Osylaısha, qoǵamda talqylanǵan máselege núkte qoıylyp, aqynnyń jerleý rásimi belgilengen tártip pen zań sheńberinde júzege asatyny naqtylandy.
