Foto: Ashyq derekkóz
Ákimshilik quqyq buzýshylyq týraly kodekske engizilgen ózgeristerge sáıkes, ekstremıstik jáne terrorıstik materıaldardy daıyndaý, saqtaý, ákelý, tasymaldaý jáne taratý úshin burynnan belgilengen jaýapkershilikke qosa, endi olardy basyp shyǵarǵany úshin de ákimshilik jaýapkershilik qarastyrylady. Bul norma «Terrorızmge qarsy is-áreket týraly» jáne «Ekstremızmge qarsy is-áreket týraly» zańdarmen, sondaı-aq Azamattyq prosestik kodekspen úılestirýge baǵyttalǵan.
Sonymen birge zańnamalyq úılesimdilikti qamtamasyz etý maqsatynda Azamattyq prosestik kodekske jáne atalǵan salalyq zańdarǵa ekstremıstik jáne terrorıstik materıaldardy tasymaldaýǵa tyıym salatyn túzetýler engizildi. Bul ózgerister quqyq buzýshylyqtardyń taralý arnalaryn shekteýge jáne olardyń aldyn alýǵa múmkindik beredi.
Budan bólek, terrorızmge qarsy is-áreketti jáne ekstremızmniń aldyn alýdy júzege asyratyn memlekettik organdardyń quzyreti naqtylandy. Bul – jaýapty qurylymdardyń mindetteri men ókilettikterin aıqyndap, saladaǵy jumystyń tıimdiligin arttyrýǵa baǵyttalǵan qadam.
