Oralda adamdardy qaǵyp ketip, boı tasalaǵan júrgizýshiler ustaldy

ORAL. 27 maýsym. Oral qalasynda 25 maýsym kúni úsh avtokólik úsh adamdy qaǵyp ketip, boı tasalady. Bul týraly Batys Qazaqstan oblystyq ishki ister departamentiniń baspasóz qyzmetine silteme jasaǵan «QazAqparat» habarlady. Atalǵan departamenttiń ákimshilik polısııasy basqarmasynyń aǵa ınspektory Nurtaı Lezovtyń habarlaǵanyndaı, qaǵylǵandardyń ekeýi – bala. Shamamen 13 saǵat 50 mınýtta «Hıýndaı» avtokóliginiń júrgizýshisi Qurmanǵazy men Temir Masın kósheleriniń qıylysynda jaıaý júrginshiler ótetin jerden 1986 jylǵy K. degen azamatty qaǵyp, oqıǵa ornynan taıyp turǵan. Oń jaq jambasynan jaraqattanǵan júrginshi oblystyq aýrýhananyń jaraqat bólimine qaralýǵa májbúr boldy. Sodan keıin saǵat 18:30-da belgisiz júrgizýshi «Mazda» kóligimen Qonaev atyndaǵy shaǵyn aýdanda P. degen 2007 jylǵy balany qaǵyp, oqıǵa ornynan boı tasalaǵan. Betinen jaraqat alǵan jasóspirim de atalǵan aýrýhana kómegine júgindi. Úshinshi oqıǵa saǵat 20:40-ta oryn aldy. «Lada» markaly kóliktiń júrgizýshisi Zavokzalnyı týpık kóshesi boıyndaǵy 25/1 úıdiń aýlasynda M. degen 2005 jylǵy jetkinshekti qaǵyp, ol da boı tasalaǵan. Sol jaq ıyǵy men tizesinen jaraqat alǵan bala jaraqat bólimine tústi. Jedel izdestirý sharalary barysynda jol-kólik oqıǵasyna kináliler tez anyqtaldy. Atap aıtqanda, «Hıýndaı-Aksenttiń» júrgizýshisi 1981 jylǵy G., «Mazda-626» kóligin júrgizgen 1992 jylǵy Ý., «Lada-21703» kóligine otyrǵan 1988 jylǵy Z. esimdi azamattar bolyp shyqty. Endi olarǵa qatysty tıisti sharalar qoldanylatyn bolady. Temir Qusaıyn. Derek, sýret: «QazAqparat».