Júlde qory 1,6 mıllıon AQSh dollaryn quraıtyn týrnırdi PGL Esports SRL uıymdastyrdy. Jarysqa álemdik deńgeıdegi 16 komanda qatysyp jatyr, olardyń arasynda Team Spirit, G2 Esports, FURIA Esports jáne Heroic bar. Shaqyrylǵan qonaqtardyń arasynda Counter-Strike boıynsha álem chempıony Dáýren Qystaýbaev, FURIA Esports oıynshysy Danııl Golýbenko, strımer Slava Býster, PGL týrnırleriniń júrgizýshisi James Banks, sondaı-aq álem chempıony Gabrıel Toledo bar. Týrnır Qazaqstan Respýblıkasy Týrızm jáne sport mınıstrligi bekitken 2026 jylǵa arnalǵan týrıstik is-sharalar kúntizbesine engizilgen.
Sarapshylar álemdik aýdıtorııanyń kıbersportqa degen qyzyǵýshylyǵynyń artýy aıasynda Qazaqstanda mundaı iri jarystardy ótkizý Astananyń sheteldik týrıster úshin tartymdylyǵyn arttyratynyn atap ótti.
Astanada kıbersporttan álemdik deńgeıdegi 16 komanda jarysqa túsedi
Elordaǵa Máskeýden arnaıy ushyp kelgen kórermenderdiń biri Aleksandr Belobýh týrnırdiń uıymdastyrylý deńgeıin joǵary baǵalady.
«Men Astanaǵa alǵash ret kelip turmyn. Qazir ań-tań kúıde otyrmyn Ásirese, jastardyń kıbersportqa degen zor qyzyǵýshylyǵy qýantady. Bul kóp jaǵdaıda Qazaqstanda qazir brazılııalyq FURIA Esports klýbynda oınaıtyn Danııl Golýbenko sııaqty myqty oıynshynyń bolýymen baılanysty bolsa kerek. Shyny kerek, ol jastardyń naǵyz kýmıri jáne oǵan ábden laıyqty. Golýbenko sapaly oıyn kórsetip, Qazaqstannyń namysyn álemdik arenada laıyqty qorǵap júr. Týrızmdi damytý turǵysynan bul eldiń óz brendin qalaı damytyp, ýaqytpen birge kele jatqanyn kórsetetin tamasha úlgi», dep atap ótti Aleksandr Belobýh.
Sport sholýshysy jáne sarapshy Nurbolat Jomart otandastarymyzdyń kıbersportty damytýǵa belsendi aralasýyn eskere otyryp, Qazaqstanda mundaı is-sharalardy ótkizýdi zańdylyq dep sanaıdy.
Astanada kıbersporttan halyqaralyq týrnır ótip jatyr
«Osydan birneshe jyl buryn PGL Astanada týrnır ótkizedi degenge sený qıyn edi. Alaıda uıymdastyrýshylar TMD elderinde Counter-Strike 2 óte tanymal ekenin jáne munda da úzdik oıynshylardyń bar ekenin kórip otyr. Solardyń biri – mo0N laqap atymen tanymal Abdýrahım Isa. Ol óte myqty kıbersportshy jáne onyń komandasy fınalǵa jete alady dep sengim keledi. Danııl Golýbenko qazirdiń ózinde tájirıbeli oıynshy, al týrnır ıesi retindegi trıbýnadaǵy jankúıerleriniń qoldaýy mańyzdy ról atqarýy múmkin. Soǵan qaramastan, týrnırdegi básekelestik óte joǵary, ásirese Team Spirit tarapynan», dep basa aıtty sarapshy.
Týrnırge qatysýshylar da PGL Astana 2026 ótkizý oqıǵalyq týrızmdi damytýǵa yqpal etetinin jáne Astananyń iri kıbersporttyq is-sharalardy ótkizýge arnalǵan halyqaralyq alań retindegi pozısııasyn nyǵaıtatynyn atap ótti.
