Foto: Alem.ai
Stýdentter ulttyq jasandy ıntellekt ınfraqurylymyna, sonyń ishinde alem.cloud, AlemLLM jáne Astana Hub resýrstaryna qol jetkize alady.
«JI ýnıversıteti 2026 jyldyń qyrkúıek aıynan bastap magıstratýra baǵdarlamasy boıynsha oqytýdy josparlap otyr. Bakalavrıat jáne doktorantýra baǵdarlamalaryn ashý máselesi qosymsha pysyqtalady», deıdi Ǵylym jáne joǵary bilim mınıstrliginiń baspasóz qyzmeti.
Mınıstrlik málimetinshe, ýnıversıtet sheteldik stýdentterdi qabyldaýdy josparlap otyr. Osy baǵytta kóptildi oqytý júıesin, shákirtaqymen qoldaý baǵdarlamalaryn jáne sheteldik talapkerlerge arnalǵan kásibı baǵdar berý qyzmetin qamtıdy.
«Kadrlardy daıarlaý jasandy ıntellekt, aqparattyq-kommýnıkasııalyq tehnologııalar, aqparattyq qaýipsizdik, AI+X jáne basqa da sabaqtas baǵyttar boıynsha júzege asyrylady. Bilim berý baǵdarlamalary jasandy ıntellekt tehnologııalaryn ekonomıkanyń túrli salalarynda qoldanýǵa baǵdarlanady», delingen mınıstrliktiń aqparatynda.
Ýnıversıtettiń professorlyq-oqytýshylyq quramy bilim berý baǵdarlamalarynyń damýy men bilim alýshylar kontıngentiniń ulǵaıýyn eskere otyryp, kezeń-kezeńimen qalyptastyrylady. Osy maqsatta otandyq jáne sheteldik oqytýshylardy, vızıt-professorlardy, sondaı-aq halyqaralyq akademııalyq jáne kásibı tájirıbesi bar mamandardy tartý josparlanyp otyr.
JI dáýirindegi mektep: Oqýshylarǵa paıdasy men qaýpi qandaı?
Mınıstrlik málimetinshe, qazirgi tańda ýnıversıtetke naqty memlekettik grant bólingen joq. Tegin oqý tek seriktestik kelisimder men demeýshilik granttar sheńberinde qarastyrylǵan.
Álemdik sarapshy Lı Kaı Fý Almatyda JI boıynsha sabaq ótkizdi
Aıta keteıik, Almatyda álemdik deńgeıdegi Innotech ýnıversıteti ashyldy. Bul joba Memleket basshysynyń AQSh-qa sapary barysynda qol jetkizilgen kelisimderdiń nátıjesinde júzege asyp otyr.
