Foto: Aqorda
«Barshańyzǵa Altyn Orda tarıhyna arnalǵan halyqaralyq sımpozıýmǵa qosh keldińizder dep aıtqym keledi. Eń aldymen, Astanaǵa arnaıy kelgen qadirli meımandarǵa shynaıy rızashylyǵymdy bildiremin. Meniń aldymda sóz sóılegen ataqty ǵalymdar men bedeldi halyqaralyq uıymdardyń ókilderine alǵys aıtamyn. Sózderińiz maǵynaly, mazmundy boldy.
Altyn Orda – Eýrazııanyń ulan-ǵaıyr aýmaǵyn erkin jaılap, Uly dala tósinde bılik qurǵan qýatty ımperııa bolǵanyna eshqandaı tarıhshy kúmán keltirmeıdi, bul – moıyndalǵan tarıhı derek. Altyn Orda Batys pen Shyǵysty jalǵap, túrli órkenıetterdiń damýyna, memleketterdiń qalyptasýyna erekshe yqpal etken asa iri saıası qurylym boldy. Bul da – dáleldengen derek. Sondyqtan Altyn Orda tarıhy kóptegen irgeli zertteýlerge arqaý bolǵany anyq. Degenmen bul taqyryp áli de ózektiligin joǵaltqan joq, menińshe, eshqashan joǵaltpaıdy», dedi Prezıdent.
Aıta keteıik, Astanada halyqaralyq sımpozıým ótip jatyr, oǵan 20-dan astam elden delegasııa keldi.
