Foto: Aqorda
«Bul – ult jylnamasy men álem tarıhy úshin óte mańyzdy másele. Biz halyqaralyq ǵylym qaýymdastyǵymen birlese otyryp, osy taqyrypty júıeli ári jan-jaqty zerdeleý jumysyn jalǵastyrýymyz kerek. Birneshe kúnge sozylatyn is-sharanyń negizgi maqsaty da – osy. Bul tusta Qazaqstannyń bastamasyna qoldaý kórsetkeni úshin IýNESKO basshylyǵyna rızashylyǵymdy aıtqym keledi, dedi Prezıdent.
Memleket basshysy sondaı-aq forýmǵa qatysyp otyrǵan IýNESKO-nyń burynǵy Bas dırektory Odre Azýlege alǵys aıtty.
«Siz Qazaqstan men IýNESKO arasyndaǵy áriptestikti nyǵaıtýǵa mol úles qostyńyz. Sımpozıýmnyń osyndaı bedeldi jahandyq uıym aıasynda ótýi Altyn Orda murasynyń álemdik aýqymdaǵy mán-maǵynasy zor ekenin kórsetedi. Búgingi jıynǵa IýNESKO-nyń joǵary deńgeıdegi ókili, Búkilálemdik muralar ortalyǵynyń dırektory Elýndý Assomo Lazar myrza bastaǵan delegasııa qatysyp otyr», deıdi Memleket basshysy.
Prezıdent óz sózinde elimiz IýNESKO-nyń qoldaýymen kóptegen mańyzdy jobany júzege asyrylǵanyn atap ótti.
«Naqty aıtqanda, Qoja Ahmet Iаsaýı kesenesi, Tamǵaly tas petroglıfteri, sondaı-aq birneshe kóne qala búkilálemdik muralar tizimine endi. Sonymen qatar ultymyzdyń materıaldyq emes mádenı muralaryn dáripteý baǵytynda aýqymdy jumys júrgizildi. Máselen, byltyr ǵana «Handar shejiresi» dep atalatyn biregeı qoljazba álemdik deńgeıde moıyndaldy. Bul – el bılegen tulǵalar týraly málimetterdi toptastyrǵan, sonyń ishinde Altyn Orda kezeńin qamtyǵan qundy qujat. Sondyqtan biz baılanysymyzdy odan ári damytýǵa múddelimiz. Bul – ózara tıimdi, mańyzdy sharýa», dedi Qasym-Jomart Toqaev.
Prezıdent Qasym-Jomart Toqaev «Altyn Orda – dala órkenıetiniń úlgisi: tarıh, arheologııa, mádenıet, biregeılik» atty halyqaralyq sımpozıýmynda sóz sóılep, baıyrǵy alyp memlekettiń tarıhy kóp zertteýlerge arqaý bolǵanyn atap ótti.
