Pavlodarda qutyrǵan ıt qaýyp alǵan er adam kóz jumdy

ASTANA. 28 maýsym. Pavlodar qalasynda qutyrǵan ıt tistep alǵay er adam qaza boldy. Bul týraly Pavlodar oblystyq densaýlyq saqtaý basqarmasy habarlady. Basqarma taratqan málimetterge qaraǵanda, er adamdy qutyrma vırýsyn juqtyrǵan ıt qaýyp alǵan. Ol aýrýhaǵa túskennen bir apta ótken soń kóz jumdy. Jergilikti densaýlyq saqtaý basqarmasynyń emdeý-aldyn alý bóliminiń jetekshisi Saltanat Tólegenova: «Aýrýdy aman saqtap qalý úshin dárigerler qoldan kelgen barlyq kómekti jasady. Alaıda, ókinishke qaraı, er adam qaıtys boldy», – dedi. Bólim jetekshisiniń sózine qaraǵanda, Pavlodar oblystyq juqpaly aýrýlar aýrýhanasyna túskeli er adam jansaqtaý bóliminde jatqan. «Aýrýdyń jaǵdaıy óte aýyr boldy, sebebi, derti tym asqynyp ketken. Kún ótken saıyn dert dendeı berdi. Sońǵy kúnderi er adam dybystardy estip-bilip jatty, biraq es-túsinde keıde ózgerister boldy», – dedi aýrýhana mamany. О́limniń naqty sebebin dárigerler ólikke tekserý júrgizgennen keıin málimdeıdi. Budan buryn, dálirek aıtqanda, mamyr aıynda Rebrovka aýylynyń 48 jastaǵy turǵyny men onyń áıeli jáne 19 jastaǵy ulyn qutyrma aýrýyn juqtyrǵan úı ıti qaýyp alǵany jóninde habarlanǵan bolatyn. Qutyrǵan ıt áıeldiń oń ıyǵynan kıiminiń syrtynan, al balasyn bileginen tistep alǵan. Eń kóp zardap shekken – otaǵasy, qutyrǵan ıt onyń qulaǵyn tistegen. Týystarynyń aıtýynsha, ıt ony 17 mamyr kúni qaýyp alǵan. Degenmen, ol dárigerlerdiń kómegine tek bir aıt ótken soń júgingen. Aýrýdyń negizgi belgilerinen bólek, er adam sýdyń syldyry men denesine tıgen kez kelgen nárseni aýyrsynǵan. Er adamnyń jubaıy men uly qarym-qatynasqa túskender retinde esepke alynyp, olarǵa eki ret qutyrýǵa qarsy vaksına egilgen. Aldyn ala jasalǵan joramaldarǵa qaraǵanda, ıt qutyrma aýrýyn aýyl úıine kirip ketken jabaıy túlkiden juqtyryp alǵan bolýy múmkin. Otbasyna shabýyl jasaǵannan keıin qojaıyny ıtti atyp óltirgen. «Bul dert Pavlodar óńirinde sońǵy 30 jyl boıy múlde tirkelmegen. Tek janýarlardyń aýyrǵandary ǵana kezdesken. Qutyrma aýrýynyń aldyn alýdyń jalǵyz joly – egý. Alaıda, osy jaǵdaıda er adam bul sharalardyń barlyǵyn qajetsinbedi», – dep atap ótti oblystyq juqpaly aýrýlar aýrýhanasynyń epıdemıolog-dárigeri Gúlmıra Qulmaǵambetova. Elaman Qońyr. Derek: Pavlodar oblystyq densaýlyq saqtaý basqarmasy. Sýret: egemen.kz.