Foto: Ashyq derekkóz
Endi ırandyq fýtbolshylar Meksıkanyń Tıhýana qalasyndaǵy lagerde jattyǵady.
«FIFA jáne álem chempıonatynyń resmı ókilderimen júrgizilgen kelissózderden keıin bizdiń ótinishimiz qabyldandy. Komanda bazasy AQSh-tan Meksıkaǵa aýystyryldy. Biz Tıhýanada, Tynyq muhıtyna jaqyn, AQSh shekarasyna taıaý lagerde turamyz», dedi Iran fýtbol federasııasynyń prezıdenti Mehdı Tadj.
Buǵan deıin AQSh-pen Iran arasyndaǵy shıeleniske baılanysty Tegeran tarapy álem chempıonatyna boıkot jarııalaý múmkindigin qarastyrǵan bolatyn. Degenmen kelissózder nátıjesinde komanda týrnırge qatysatyny rastaldy.
Jerebe qorytyndysy boıynsha Iran barlyq toptyq matchtaryn AQSh aýmaǵynda ótkizýi tıis bolǵan.
Keıin FIFA-men kelissózder júrgizilip, matchtardy Meksıkaǵa aýystyrý máselesi qaraldy. Degenmen uıymdastyrýshylar tarapynan bul sheshim tolyq bekitilmegeni aıtylǵan bolatyn.
Aıta keteıik, bıyl 48 komanda qatysatyn álem chempıonaty 11 maýsym men 19 shilde aralyǵynda AQSh, Kanada jáne Meksıkada ótedi. Álem birinshiliginde Iran quramasy G tobyna túsip, Jańa Zelandııa, Belgııa jáne Egıpet komandalarymen oınaıdy. Ala dop alamanyn otandyq jankúıerler tikeleı efırde tamashalaı alady.
