Foto: Aqorda
Qasym-Jomart Toqaev Reseı Prezıdentiniń memlekettik saparyn eki eldiń strategııalyq seriktestigi men odaqtastyq qatynastaryn damytýdaǵy mańyzdy oqıǵa retinde qarastyratynyn atap ótti.
«Eń aldymen, kezdesýimizdiń qarsańynda jarııalanǵan mazmundy maqalasy úshin Reseı Prezıdentine alǵys aıtamyn. Bul materıaldy halqymyz yqylaspen oqydy. О́ıtkeni maqalada tatý kórshilik pen ózara qurmetke negizdelgen yntymaqtastyqty tabysty ilgeriletý úshin mańyzy zor naqty derekter men paıymdar kórinis tapqan. Búkil eýrazııalyq keńistiktegi turaqtylyq pen órkendeýge ortaq jaýapkershilik arqalaý – Qazaqstan-Reseı yqpaldastyǵynyń negizgi máni degen pikirmen kelispeske bolmaıdy. Qazaqstan tarapyna aıtylǵan jyly lebizder men elimizde júrgizilip jatqan reformalarǵa berilgen joǵary baǵa úshin shynaıy rızashylyǵymdy bildiremin», dedi Qasym-Jomart Toqaev.
Qazaqstan Prezıdentiniń aıtýynsha, búgingi sapar ekijaqty yntymaqtastyq aıasyndaǵy sapaly ózgeristerdi aıqyn kórsetti.
«Muny mynadaı obektıvti kórsetkishterden ańǵaramyz: saýda-sattyq kólemi 30 mıllıard dollarlyq mejege jetedi dep boljanyp otyr, al ekonomıkamyzǵa quıǵan ınvestısııa boıynsha Reseı basqa elder arasynda birinshi orynǵa shyqty. Ekonomıkalyq yntymaqtastyq aıasyndaǵy bastamalar tizimine 177 perspektıvti joba kirdi, onyń 122-si operasııalyq sıklge ótti, ıaǵnı, iske asyryldy. Qazaqstan Reseımen máńgi dostyqty jáne strategııalyq seriktestikti joǵary baǵalaıdy. Biz Reseıdi árdaıym Eýrazııadaǵy tarıhy baı ári damý áleýeti zor memleket dep sanaımyz. Qazirdiń ózinde sanksııalar saldarynan týyndaǵan qıyndyqqa qaramastan, Reseı ekonomıkasy satyp alý qabiletiniń parıteti boıynsha álemde – tórtinshi orynǵa, al Eýropada birinshi orynǵa shyqty. Muny iri halyqaralyq qarjy ınstıtýttarynyń málimetteri rastaıdy. Byltyr Reseıdiń nomınaldy ishki jalpy ónimi 2,5 trıllıon dollardan asty. Bul – keremet nátıje. Reseı tabıǵı resýrstary mol, ınjenerlik-ǵylymı elıtasy men bilikti jumysshylary bar el retinde jahandyq ekonomıkadaǵy jetekshi ornyn eshqashan joǵaltpaıdy. Sáıkesinshe, dúnıejúzilik geosaıası sahnada mańyzdy ról atqarady. Yntymaqtastyq perspektıvasyna qatysty sóz qozǵaǵanda, búgin qabyldanǵan «Qazaqstan jáne Reseı halyqtary arasyndaǵy dostyq pen tatý kórshiliktiń jeti negizi týraly» birlesken málimdemeniń erekshe mańyzyna toqtalǵym keledi. Atalǵan qujat maqsattardy aıqyndaý turǵysynan muqııat oılastyrylǵan. Onda elderimizdiń strategııalyq seriktestigi jáne tatý kórshilik qatynastaryn odan ári damytýdyń senimdi negizi men uzaqmerzimdi baǵdary kórinis tapqan», dedi Memleket basshysy.
Eske salaıyq, keshe Reseı Prezıdenti Vladımır Pýtın Qazaqstanǵa memlekettik saparmen keldi. «Egemen Qazaqstan» gazetinde Vladımır Pýtınniń «Reseı – Qazaqstan: Eýrazııa tórindegi odaq» atty maqalasy jarııalandy.
