Qostanaıdaǵy geologııalyq mýzeı saqtalatyn boldy

QOSTANAI. 29 maýsym.  Osydan biraz buryn «QR mıneraldyq resýrstar akademııasy» Soltústik Qazaqstan fılıalynyń tóraǵasy Vıktor Deıneka oblys ákimine hat jazyp, onda Qostanaıdaǵy geologııalyq mýzeıdi saqtap qalý úshin ony qarjylandyrý problemasyn kótergen bolatyn. Jaqynda osy máseleni nazarda ustaǵan Nuraly Sádýaqsov geologııalyq mýzeıge ózi baryp, máseleniń mán-jaıyna qanyqty. Bul týraly alau.kz saıtyna silteme jasaı otyryp, egemen.kz tilshisi habarlady. Hatynda Vıktor Kýzmıch Soltústik Qazaqstan geologııalyq jáne jer qoınaýyn paıdalaný aımaqaralyq basqarmasynyń Kókshetaý qalasyna kóshirilýine baılanysty Qostanaı qalasyndaǵy geologııalyq mýzeı jaǵdaıynyń syn kótermeı turǵanyn jazǵan bolatyn. Onda avtor mýzeı ornalasqan ǵımarat, mýzeıdiń jumys istemeýine baılanysty jaǵdaılardy kótergen edi. Qazir mýzeı «Qostanaı izdestirý-túsirý ekspedısııasy» jaýapkershiligi shekteýli seriktestiginiń esebinen tur, biraq bul kásiporynnyń ózi búginde qarjylyq qıynshylyqty bastan keship otyr. Osyǵan baılanysty Soltústik Qazaqstan geologııalyq jáne jer qoınaýyn paıdalaný aımaqaralyq basqarmasynyń basshylyǵy mýzeıdi Kókshetaýǵa kóshirý týraly sheshim qabyldaǵan bolatyn. Mýzeıge kelgen oblys ákimi Nuraly Sádýaqasov ondaǵy óte baı jádigerlermen tanysty.  Mýzeı dırektory Tatıana Krylova áńgimelegendeı, munda 5 myńǵa jýyq geologııalyq mıneraldar úlgileri qoıylǵan. Onyń syrtynda 10 myńǵa jýyq jádiger qoımada saqtaýly. Sonymen qatar mýzeıde 1961 jáne 2013 jyldary Áýlıekólden tabylǵan munaı synamasy da bar. Mýzeı qyzmetkeriniń aıtýynsha, eksponattarynyń kóptigi jóninen respýblıkada onyń teńdesi az. Mýzeı dırektory Tatıana Krylova: «Bizdiń maqsat mýzeıdi osy ǵımaratta qaldyrý bolyp otyr. Munda tastar júıelenip qoıylǵan» dedi. Oblys ákimi mýzeıdi oblystyń kommýnaldyń menshigine ótkizý kerek dep sheshti. Oblys ákimi Nuraly Sádýaqasov: «Mýzeıdiń bilimdik, tanymdyq mádenı áleýetin kórip otyryp, ony saqtaýǵa tıispiz. Jaqyn ýaqytta mýzeıdi oblystyń kommýnaldyq menshigine alý jumysyn bastaımyz. Sodan ary qaraı kóremiz. Mýzeı oblystyq tarıhı-ólketaný mýzeıi retinde jumys isteıdi nemese onyń arnaıy fılıaly bolady. Mýzeıdi oblys qarjylandyratyn bolady», dedi. Názıra Járimbetova. Derek, sýret: alau.kz