Turǵyndardyń aıtýynsha, qaraqurttar balalar jáne oıyn alańdarynyń mańynda jıi kezdesetin bolǵan. Jyl basynan beri qaraqurt shaqqannan keıin 18 adam medısınalyq kómekke júgingen.
Qaraqurttardyń kóbeıýine baılanysty oblys ákimdiginde arnaıy keńes ótkizilip, oǵan medısınalyq uıymdardyń basshylary, sanıtarııalyq-epıdemıologııalyq baqylaý departamentiniń ókilderi jáne salalyq mamandar qatysty.
Abaılańyz, qaraqurt: Qazaqstanda qaýipti órmekshiler jandana bastady
Mamandardyń málimetinshe, bıyl mol jaýyn-shashynnyń áserinen qaraqurttar ádettegiden erterek jáne kóp mólsherde paıda bolǵan. Sonyń saldarynan óńirde ýly órmekshiler shaqqan turǵyndar sany artyp otyr.
Keńes barysynda oblystaǵy keıbir medısınalyq mekemelerde qaraqurt ýyna qarsy arnaıy sarysý qory jetkiliksiz ekeni aıtyldy. Osyǵan baılanysty zardap shekkenderdi oblys ortalyǵyndaǵy aýrýhanalarǵa tasymaldaýǵa týra keledi.
«Qalyptasqan jaǵdaıdy eskere otyryp, ákimdik tarapynan zardap shekkenderge der kezinde medısınalyq kómek kórsetý jáne qaraqurt shaǵýynyń aldyn alý boıynsha naqty tapsyrmalar berildi. Atap aıtqanda, oblystyń barlyq qala men aýdanynda qaraqurtqa qarsy sarysýdyń qajetti qoryn qalyptastyrý, turǵyndar arasynda túsindirý jumystaryn kúsheıtý, aýlalar men sharýashylyq aýmaqtaryn tazalaý, sondaı-aq dezınseksııalyq sharalardy júrgizý tapsyryldy», dep habarlady О́ńirlik qoǵamdyq kommýnıkasııalar ortalyǵy.
Sondaı-aq balalar baqshalarynda, jazǵy saýyqtyrý lagerlerinde jáne ózge de balalar mekemelerinde qaýipsizdik sharalaryn kúsheıtý tapsyryldy.
Mańǵystaý oblystyq balalar aýrýhanasynyń dırektory Janar Dosjanovanyń aıtýynsha, sońǵy on kún ishinde qaraqurt shaqty degen kúdikpen eki bala aýrýhanaǵa túsken.
«Balalarda shaqqan jerdiń qatty aýyrýy, deneniń ártúrli bólikterindegi aýyrsyný, júrek aıný, qusý, dene qyzýynyń kóterilýi jáne qatty mazasyzdyq belgileri baıqaldy. Sondyqtan ata-analar balalardyń oıyn alańdary men demalys oryndaryndaǵy qaýipsizdigine erekshe nazar aýdarýy qajet. Qazirgi ýaqytta balalar qajetti em qabyldap jatyr, olardyń jaǵdaıy turaqtandy», dedi Janar Dosjanova.
