Tekserý barysynda shetel azamattarynyń turǵylyqty jerleri, qurylys nysandary, bazarlar men sheteldik jumys kúshin paıdalanatyn uıymdar qamtyldy.
Nátıjesinde kóshi-qon zańnamasyn buzýǵa qatysty 13 035 quqyqbuzýshylyq anyqtaldy. Onyń ishinde 9 359 shetel azamaty elde bolý tártibin buzǵany úshin, al 3 828 adam eńbek qyzmetin zańsyz júzege asyrǵany úshin ákimshilik jaýapkershilikke tartyldy. Sonymen qatar 882 jumys berýshi sheteldik jumys kúshin zańsyz paıdalanǵany úshin jaýapqa tartylsa, 2 794 jeke jáne zańdy tulǵa shetel azamattarynyń ózderinde turatyny týraly polısııaǵa ýaqytyly habarlamaǵan.
Sot sheshimine sáıkes kóshi-qon zańnamasyn buzǵan 1 559 adam Qazaqstan aýmaǵynan shyǵaryldy. Sondaı-aq 1 836 shetel azamatynyń elde bolý merzimi qysqartyldy. Onyń ishinde 122 adam májbúrli túrde deportasııalanyp, olarǵa bes jylǵa Qazaqstanǵa kirýge tyıym salyndy.
Is-shara barysynda Qazaqstanǵa zańsyz kirgen 14 shetel azamaty anyqtaldy. Qazirgi ýaqytta bul faktiler boıynsha shekara qyzmetimen birlesken tergeý júrip jatyr. Budan bólek, halyqaralyq izdeýde júrgen jáne óz elderiniń quqyq qorǵaý organdarynan jasyrynǵan 21 shetel azamaty ustaldy.
Quqyq qorǵaý organdarynyń málimetinshe, kóshi-qon zańnamasynyń buzylýyna keı jaǵdaıda zańsyz tabys tabýdy kózdegen Qazaqstan azamattarynyń ózderi sebep bolyp otyr. Máselen, Atyraý oblysynda shetel azamattaryn kórshi memleketke zańsyz ótkizýdi uıymdastyrǵan otandasymyz ustaldy. Osyndaı derekter Jambyl jáne Pavlodar oblystarynda da tirkelgen.
Aqtóbe oblysyndaǵy qurylys alańdarynyń birinde ruqsatsyz jumys istegen 60-qa jýyq shetel azamaty anyqtaldy. Al Astanada jumys berýshi Afrıka elderinen kelgen alty azamatty zańsyz eńbekke tartqan. Sonymen qatar Almaty jáne Shymkent qalalarynda, Qaraǵandy, Almaty, Atyraý, Mańǵystaý, Shyǵys Qazaqstan, Qostanaı jáne Soltústik Qazaqstan oblystarynda sheteldikterdi zańsyz jumysqa tartý faktileri anyqtaldy.
Zań buzǵan barlyq tulǵalar men jumys berýshilerge qatysty tıisti sharalar qabyldandy. Sondaı-aq bir jyl ishinde sheteldik jumys kúshin tartý qaǵıdalaryn birneshe ret buzǵan bes jumys berýshige qatysty qylmystyq tergeý bastaldy. Mundaı faktiler Jambyl, Qaraǵandy jáne Atyraý oblystarynda, sondaı-aq Shymkent qalasynda tirkelgen.
Quqyq qorǵaý organdary kóshi-qon zańnamasynyń saqtalýyn baqylaý jáne quqyq buzýshylyqtardyń aldyn alý baǵytyndaǵy jumystardyń jalǵasatynyn málimdedi.
