Sýretti túsirgen – Jarqynaı MURATQYZY
Dımash ózi oqyǵan mektepti aralap, synyptarǵa kirip, balalyq shaǵy ótken ortamen qaıta qaýyshty. Mektep sahnasyna kóterilip, osy jerde óner jolyndaǵy alǵashqy qadamy bastalǵanyn esine aldy. Oqýshylar qurmetti qonaqqa konserttik baǵdarlama daıyndap, Dımashtyń ánderin oryndady. Keshtiń erekshe sátteriniń biri – mektep orkestrimen birge oryndalǵan «Adaı» kúıi.
«Bilim alǵan mektebim – №32 gımnazııa. Munda kelip oqyǵan synybymdy, otyrǵan partamdy kórdim. Maǵan sabaq bergen ustazdaryma degen saǵynyshymdy osylaısha bildirgim keldi. Bul gımnazııa – maǵan ystyq uıa. Mektepte ótkizgen árbir sátim, alǵan bilimim men tárbıem árdaıym júregimniń tórinde saqtalady», dedi ánshi. Ol oqýshylarǵa bilim men ulttyq rýhty qatar sińirý keregin jetkizdi.
Synyp jetekshisi Roza Qýanyshqyzy bala Dımashtyń minezin bylaı sıpattady: «Dımash shákirtim mektepte oqyp júrgende-aq ózgelerden oqshaý turatyn. Onyń boıyndaǵy eń asyl qasıet – kishipeıildik pen meıirim».
Sondaı-aq muǵalimderge kómektesip, aýyr zattaryn kóterip júretinin, biraq ony eshqashan maqtanyp aıtpaıtynyn da atap ótti.
Al bastaýysh synyptaǵy jetekshisi Klara Januzaqqyzy bul kezdesýde erekshe tolqyǵanyn jasyrmady. Onyń aıtýynsha, Dımash 1-synyptan bastap belsendiligimen kózge túsken. «Sabaqta da, mektepten tys is-sharalarda da belsendi boldy. «Álippemen» qoshtasý keshinde Abaıdyń «Jelsiz túnde jaryq aı» ánin fortepıanoda oryndady. Bastaýyshpen qoshtasý keshinde «Aq kógershin» ánin jandy daýysta aıtty. Mekteptegi kóptegen sharany júrgizdi. Sóz sóıleý mádenıeti óte joǵary edi. Kezdesýde Dımash meni qushaqtaǵanda tóbem kókke jetkendeı qýandym. Dımash barlyq ustazymen jyly amandasty. Oqýshylarǵa da erekshe yqylas tanytty. Balalardyń qýanyshynda shek bolǵan joq», dep eske aldy ustazy.
Dıana ÁDILHAN,
L.N.Gýmılev atyndaǵy Eýrazııa ulttyq ýnıversıtetiniń stýdenti
