Fýtboldan shamaly bolsa da habary bar adamdardyń barlyǵy «Ispanııa quramasy Atlantıka muhıtynda ornalasqan nebári 500 myńnan asatyn halqy bar Kabo-Verdeni qalpaqpen uryp alady» dep oılaǵan edi. Sebebi, 2010 jyly tórtkúl dúnıeniń teńdessizi dep tanylyp, sońǵy Eýropa chempıonatynda top jarǵan Pıreneı túbeginiń tarlandary búgingi tańda da jaqsy babynda. Bıylǵy mýndıalda olar basty favorıtterdiń sanatynda. Al osyndaı uly dúrmekke alǵash ret qatysyp otyrǵan araldyqtardyń aýtsaıderler qatarynda ekeni anyq.
«Dop – domalaq» dep beker aıtylmaǵan ǵoı. Quramynda Lamın Iаmal, Ferran Torres, Rodrı, Pedrı, Danı Olmo, Nıko Ýılıams, taǵy basqa da betkeustar oıynshylary bar ıspandyqtardyń barlyq shabýylyna qara qurlyq ókilderi toıtarys berdi. Jasy 40-tan asqan Jozımar Dıash Vozınıanyń asqan sheberliginiń arqasynda Kabo-Verdeniń qaqpasy aman qaldy. Golkıper kezdesý barysynda segiz seıv jasap, san mıllıon kórermenniń qoshemetine bólendi. Sóıtip, favorıt pen debıýtant arasyndaǵy báseke 0:0 esebimen teń aıaqtaldy.
Saýd Arabııasy men Ýrýgvaı quramalarynyń kezdesýinde de kishigirim sensasııa tirkeldi. Qos komanda alǵashynda jap-jaqsy shabýyldar uıymdastyrǵannan keıin oıyn birazǵa deıin saıabyrsyp qaldy. 41-mınýtta Hasan ál-Tamabaktıdiń tepken dobyn Fernando Mýslera keri qaıtarǵanymen, oǵan birinshi bolyp jetken Abýlela ál-Ámrı esep ashty. 80-mınýtta dál sondaı jaǵdaı Saýd Arabııasynyń qaqpasynyń aldynda qaıtalandy. Osy joly keri qaıtqan dopty Maksımılıano Araýho qaıta qaqpaǵa toǵytty – 1:1.
Belgııa men Mysyr arasyndaǵy match bastalǵan bette eýropalyqtar tizgindi qolǵa alýǵa tyrysyp, tolassyz shabýyldady. Biraq óte saýatty qorǵanǵan qarsylastary qaýiptiń betin qaıtardy. О́zderi de ara-tura qarymta shabýylǵa júgindi. Solardyń biri óz nátıjesin berdi. 20-mınýtta Emam Ashýrdyń qaqpanyń oń buryshynda baǵyttaǵan dobyna Tıbo Kýrtýa úlgermedi. Gol jiberip alǵannan keıin belgııalyqtar jaǵdaıdy túzeýge talpyndy. Mysyrlyqtar olardyń yrqyna kónbedi. Jeńistiń aýyly alystap bara jatqanyn túsingen Rýdı Garsııa 66-mınýtta alańǵa tájirıbeli Romelý Lýkakýdy shyǵardy. Bul ońdy sheshim boldy. Shabýylshy shyqqan bette qarsylastarynyń aıyp alańyna basa kóktep kirdi. Onyń tebýge yńǵaılaǵan doby Muhamed Hanıdiń aıaǵyna tıip, avtogolǵa aınaldy – 1:1.
Iran men Jańa Zelandııa matchynda tórt gol soǵyldy. Qos komanda qansha jantalasqanymen bir-birin ala almady. Báseke barysynda jańazelandııalyqtar eki ret alǵa shyqty. Elaıdja Djast dýbl avtory atandy. Degenmen Parsy eliniń oıynshylary eki retinde de esepti teńestirdi. Goldardy Ramın Rezaeıan men Muhammed Mohebı saldy. Sóıtip, dúısenbiden seısenbige qaraǵan túni ótken tórt oıynnyń barlyǵy da teń eseppen aıaqtaldy.
