OQU Memleket basshysy Qasym-Jomart Toqaevtyń memlekettik qyzmetterdi sıfrlandyrý jáne biryńǵaı sıfrlyq ınfraqurylymdy damytý jónindegi tapsyrmalaryn iske asyrý aıasynda jasaqtalyp otyr. Joba derekterdiń ózektiligi men birizdiligin qamtamasyz etýden bastap, prosesterdiń ashyqtyǵyn arttyrýǵa deıingi birqatar júıeli mindetterdi sheshýge baǵyttalǵan. Búgingi tańda platforma arqyly birinshi synypqa qujat qabyldaýǵa 105 myńnan astam ótinish berilgen. Qyzmetti iske qosý prosesi respýblıka boıynsha kezeń-kezeńimen júrgizilip jatyr.
Bilim berý platformasyn Oqý-aǵartý mınıstrligi, Jasandy ıntellekt jáne sıfrlyq damý mınıstrligi, «Qazaqtelekom» AQ, Bilim Group IT holdıngi men «Ulttyq aqparattyq tehnologııalar» AQ birlese júzege asyrǵan. Ulttyq platformanyń qandaı mindetterdi sheshetinin jáne onyń bilim berý júıesin sıfrlandyrýdaǵy róli qandaı bolatynyn saralap kórdik.
Mamyr aıynyń 27-isinen bastap elimizde balalardy birinshi synypqa qabyldaý bastaldy. О́tken jyldarǵa qaraǵanda, bıyl qujat tapsyrý óńirler boıynsha kezeń-kezeńimen bastalyp jatyr. Astana qalasy men Abaı, Jetisý oblysy, Qyzylorda, Batys Qazaqstan oblystaryndaǵy ata-analar birinshi bolyp mektepke qujat tapsyrǵandar qatarynda bolsa, 10 maýsymnan bastap memlekettik qyzmet Almaty qalasy men Aqmola, Aqtóbe, Jambyl, Shyǵys Qazaqstan oblystarynyń turǵyndaryna qoljetimdi boldy. Bıyl bul qyzmet OQU ulttyq bilim berý platformasy arqyly júzege asyp otyr. Alaıda birinshi synypqa qabyldaý platformada aldaǵy ýaqytta usynylatyn birneshe memlekettik qyzmettiń biri ǵana bolmaq.
«Birinshi synypqa qujat qabyldaý – OQU platformasyna kóshirilgen alǵashqy aýqymdy qyzmetterdiń biri. Bul biz úshin óte mańyzdy qyzmet desek bolady, óıtkeni jyl saıyn elimiz boıynsha júz myńdaǵan otbasy osy qyzmetti paıdalanady. О́tken jyldarmen salystyrǵanda bul prosesti aıtarlyqtaı jeńildettik. Memlekettik aqparattyq júıelermen yqpaldasý arqasynda qajetti derekterdiń basym bóligi avtomatty túrde júkteledi. Sondyqtan ata-analarǵa burynǵydaı qujat jınaýdyń nemese túrli júıelerge bir aqparatty qaıtalap engizýdiń qajeti joq. Tek platformaǵa kirip, mektepti tańdap, ótinim berý jetkilikti. Oǵan qosa, bıyl platforma óńirler boıynsha kezeń-kezeńimen iske qosylyp jatyr. Mundaı tásil júktemeni birkelki bólýge jáne qujat qabyldaý naýqany kezinde júıeniń turaqty jumysyn qamtamasyz etýge múmkindik berdi», deıdi platforma ázirleýshilerdiń biri Bilim Group IT holdınginiń bas dırektory Aleksandr Savchenko.
Onyń aıtýynsha, OQU ulttyq platformasy bilim berý júıesindegi derekterdi, memlekettik qyzmetterdi jáne negizgi prosesterdi ózara baılanystyratyn biryńǵaı sıfrlyq orta qalyptastyrýǵa baǵyttalǵan. Júıe memleketke naqty ári ashyq derekterge súıenýge, bilim berý uıymdaryna birizdi prosesterdi azaıtýǵa, al azamattarǵa memlekettik qyzmetterdi jyldam ári yńǵaıly formatta alýǵa múmkindik beredi.
Jasandy ıntellekt ár synypta: Prezıdent Jarlyǵy orta bilim berýdi aýqymdy sıfrlandyrýdy bastaıdy
«Bilim Group bul jobaǵa tehnologııalyq jáne ádistemelik seriktes retinde qatysyp otyr. Bizdiń komanda platformany jasaýǵa, sıfrlyq sheshimderdi ázirlep, engizýge, sonymen qatar OQU-dyń memlekettik deńgeıde tıimdi jumys isteýine qajetti sıfrlyq prosesterdi jolǵa qoıýǵa atsalysty. Platformany ázirleý barysynda biz bilim berý tehnologııalary salasyndaǵy 15 jyldan astam tájirıbemizge, onyń ishinde aýqymdy sıfrlyq jobalardy iske asyrýdaǵy jáne ınfraqurylymdyq sheshimderdi qurýdaǵy ádistemelerimizge súıendik», deıdi Aleksandr Savchenko.
Ulttyq bilim berý platformasyn jasaqtaý kezinde memlekettik derekqorlarmen jáne aqparattyq júıelermen yqpaldasýǵa erekshe mán berilgen. Sonymen qatar aqparattyq qaýipsizdik pen derekterdi senimdi saqtaýǵa erekshe kóńil bólingen. Platforma memleket basshysynyń sıfrlandyrý salasyndaǵy tapsyrmalary aıasynda damyp jatqan memlekettik QazTech platformasynda ornalastyrylǵan. Biryńǵaı memlekettik platforma zamanaýı qaýipsizdik standarttaryn, senimdilikti jáne servısterdiń úzdiksiz jumysyn qamtamasyz etýge múmkindik beredi. Bilim Group ázirleýshisi jáne joba jetekshisi Nazır Jashıbekovtyń aıtýynsha, júıede paıdalanýshylardyń áreketterin baqylaý, turaqty tehnıkalyq monıtorıng júrgizý jáne derekterdiń rezervtik kóshirmesin jasaý tetikteri engizilgen.
«Búgingi tańda OQU arqyly 105 myńnan astam ótinim berildi. Júıeniń tıimdi tustaryn ata-analar da, bilim berý uıymdary da baıqap jatyr. Qoldanýshylardyń keri baılanysyn da jiti qadaǵalap otyrmyz. Kóptegen ata-ana prosestiń nebári birneshe mınýt alatynyn, mekteptiń jaýaby jyldam kelip jatqanyn aıtýda. Bizdiń oıymyzsha, bul sıfrlandyrýdyń kúndelikti ómirimizdiń bir bóligine aınalyp, qyzmetterdi tez ári yńǵaıly formatta alýǵa qalaı kómektesetininiń aıqyn kórinisi», deıdi Nazır Jashıbekov.
Aıtyp ótkenimizdeı, OQU platformasy tek bir qyzmetpen shektelmeıdi. Qazirdiń ózinde OQU arqyly pılottyq rejımde qosymsha bilim berý salasyndaǵy memlekettik qyzmetter usynylǵan. Aldaǵy ýaqytta platforma mektepke deıingi, orta, sonymen qatar tehnıkalyq jáne kásiptik bilim berý deńgeılerin de qamtymaq.
