Qurylys qarqyny báseńdemeýi tıis

Keshe Jambyl oblysyna jumys saparymen kelgen Premer-Mınıstrdiń orynbasary Berdibek Saparbaev Qazaq handyǵynyń 550 jyldyq mereıtoıyna daıyndyq jumystarymen tanysty. Elimizdiń 14 oblysy kómekke kelip, kóne qalanyń toı ótetin jerlerin abattandyrý, ja­ńartý, kórkeıtý jumystaryn júrgizýdi mindetterine alǵaly beri Taraz kún sanap qulpyryp ke­ledi. Qazirdiń ózinde Qyzylorda, Qostanaı, Mańǵystaý oblystary mindetterine alǵan qurylystardy tolyq aıaqtasa, Atyraý, Soltústik Qazaqstan jáne Pavlodar oblys­tary jumystyń 95 paıyzynan astamyn eńserip tastapty. Kóne qalanyń qaq tórinen boı kóterip jatqan «Ejelgi Ta­raz» mýzeıi, ashyq aspan asty mu­ra­­jaıy, «Qazaq handyǵy» mo­nýmenti, «Atshabar» ıppo­dromy, Dostyq úıi sekildi ny­san­dardyń qurylysy qyzý jú­rýde. Alǵashqy úsh nysan­nyń qury­lysyn qyrkúıek aıynyń sońy men qazan aıynyń basynda aıaqtaý jos­parlanǵan. Al, Dostyq úıi jyl sońyna deıin paıdalanýǵa berilmek. – Daıyndyq jumystarynda il­gerileýshilik bar. Endi osy qarqyndy báseńdetip almaý qajet. Árbir ýaqytty tıimdi paıdalanyp, táýlik boıy jumys toqtamaýy tıis. Oǵan Taraz qala­synyń aýa raıy múmkindik beredi. Qyrkúıek aıynan bastap senbilikter uıymdastyryp, qalanyń tazalyǵyna qatty mán berý kerek, – dedi Berdibek Saparbaev. Aıtpaqshy kóne qalanyń ornynda qazba jumystaryn júrgizip jatqan top tabyssyz emes eken. Ja­qynda qazynanyń ústinen shyǵyp, altyn men kúmisten jasalynǵan bilezik jáne basqa da buıymdar salynǵan kishigirim qumyra taýypty. Bul qundy jádigerler aldaǵy ýaqytta arnaıy saraptamadan ótetin bolady. Premer-Mınıstrdiń orynbasary B. Saparbaev bul saparynda Taraz qalasyndaǵy saýda oryndarynda bolyp, teńge erkin aınalymǵa jiberilgeli beri aımaqtaǵy azyq-túlik baǵasynyń turaqtylyǵyna nazar aýdardy. Bas-aıaǵy 250 adamdy jumyspen qamtyp otyrǵan «Skıf-Treıd» saý­da ortalyǵynda baǵanyń negizsiz kóterilgeni baıqalmaıdy. Halyq kóp tutynatyn azyq-túlik túrleri burynǵy baǵamen satylýda. «Qazfosfat» JShS-iniń bas dırektory Muqash Eskendirov kásiporynnyń jaǵdaıy turaqty ekenin aıtty. Shy­ǵarǵan óniminiń 95 paıyzyn shetelge satatyn bul kásiporynda búginde 6 myńnan astam jumysshy eńbek etedi. Eshqandaı jumys orny qysqarmaǵan, jalaqy ýaqtyly berilip tur. Al, teńge erkin aınalymǵa jiberilgeli beri «Tamaq» JShS-niń ónimderine suranys kóbeıipti. «Bizdiń seriktestikte 300-den astam adam jumys isteıdi. Sońǵy bir aptada suranystyń kóbeıýine baılanysty 26 vagon ónim jónelttik. Shynymdy aıtsam, sońǵy 15 jylda mundaı kólemde taýar satqan emespiz», deıdi «Tamaq» JShS-niń dırektory Gúlmıra Qońqasheva. Jalpy alǵanda, oblysta jáne aýdandarda baǵany turaqtandyrý jóninde arnaıy shtab qurylǵan. Tıisti jumystar atqarylyp jatyr. Premer-Mınıstrdiń orynbasary Berdibek Saparbaev eń bas­tysy baǵanyń negizsiz sharyqtamaýyn, jumyssyzdyqtyń kóbeıip, jalaqynyń keshigip berilmeýin qadaǵalaýdy tapsyrdy. Oralhan DÁÝIT, «Egemen Qazaqstan». Jambyl oblysy. Sýretti túsirgen  Altynbek QARTABAI.