Batys Qazaqstanda aýyl joldary respýblıkalyq mártebe almaq

ORAL. 21 mamyr. Batys Qazaqstanda oblys ortalyǵynan eń alys jatqan Bókeı orda men Jánibek aýdandaryna jetkizetin tas joldar respýblıkalyq mańyzǵa ıe bolmaq. Naqty aıtsaq, aýdan ortalyqtary Saıhyn men Jánibekke jetkizetin avtojoldar respýblıkalyq bıýdjettiń balansyna kóshiriledi. Bul týraly egemen.kz habarlady. Batys Qazaqstan oblystyq avtomobıl joldary basqarmasy basshysynyń orynbasary Áskerbek Jaqsyǵulovtyń aıtýynsha, bul shalǵaı óńirde ornalasqan tas joldardy jóndeý isin qarjylandyrýdy jeńildetý maqsatynan týyndap otyr. «Bıylǵy jyly oblys ortalyǵynan Jańaqala aýdanynyń ortalyǵyna deıingi avtojolǵa jergilikti bıýdjet qarajaty esebinen kúrdeli jóndeý júrgizildi. Ári qaraı Jańaqala men Saıhynnyń aralyǵynda 250 shaqyrymǵa sozylyp jatqan jaıdaq jol bar. Ony jóndeý úshin mol qarajat kerek. Ondaı qarjynyń jergilikti bıýdjetten tabyla qoıýy ekitalaı. Sondyqtan osy joldy ortalyqqa berý jumystary júrgizilýde. Eger bul aralyq respýblıkalyq mańyzǵa ıe bolsa, ony ortalyqtan qarjylandyrýǵa zańdy negiz qalanbaq», – deıdi basqarma basshysynyń orynbasary. Temir Qusaıyn. Derek: egemen.kz. Sýret: mgorod.kz.