Elbasy Lıtva premer-mınıstri Algırdas Býtkıavıchıýspen kezdesti

ASTANA. 21 mamyr. Memleket basshysy VIII Astana ekonomıkalyq forýmyna qatysýǵa kelgen Lıtva premer-mınıstri Algırdas Býtkıavıchıýspen kezdesti. Bul týraly akorda.kz habarlady. Kezdesý barysynda ekijaqty, sonyń ishinde saýda-ekonomıkalyq jáne ınvestısııalyq salalardaǵy ózara yqpaldastyq máseleleri talqylandy. Elbasy 2007-2009 jyldardaǵy jahandyq qarjy-ekonomıkalyq daǵdarysqa jaýap retinde uıymdastyrylǵan forýmǵa qatysatyny úshin Lıtva premer-mınıstrine alǵys aıtty. «Forýmǵa 90 elden kelgen 3 000 delegat qatysady. Biz Qazaqstannyń ınfraqurylymdyq jáne ındýstrııalyq damý turǵysynan qabyldap jatqan sharalary men júzege asyryp jatqan ózge de baǵdarlamalary týraly aıtpaq nıettemiz», – dedi Memleket basshysy. Nursultan Nazarbaev eki eldiń arasyndaǵy saıası dıalog pen ekonomıkalyq yntymaqtastyqtyń deńgeıi joǵary ekenin atap ótti. «Lıtvamen árqashan jaqsy qarym-qatynasta boldyq. Sizdiń saparyńyz yntymaqtastyqty odan ári keńeıtýge qyzmet etedi dep úmittenemin», – dedi Prezıdent. Algırdas Býtkıavıchıýs ekijaqty qarym-qatynastardy nyǵaıtýǵa jáne damytýǵa qosqan eleýli úlesi úshin Qazaqstan Prezıdentine alǵys aıtty. «Qazaqstan Lıtvanyń Ortalyq Azııadaǵy mańyzdy seriktesi bolyp sanalady», – dedi ol. Lıtva premer-mınıstri sondaı-aq, Nursultan Nazarbaevty el Prezıdenti laýazymyna qaıta saılanýymen quttyqtap, Qazaqstannyń alǵa qoıǵan barlyq maqsattaryna jetetinine senimdilik bildirdi. Elaman Qońyr. Derek, sýret: akorda.kz.